Цагдаагийн байгууллагад 2023 оны арваннэгдүгээр сарын 30-ны өдрийн 23 цаг 40 минутад Баянгол дүүргийн 11 дүгээр хорооны нутаг дэвсгэрт байрлах орон сууцны байрнаас “Толгойдоо цохиулсан хүүхэд хүргэгдэн ирсэн” гэх дуудлага, мэдээлэл бүртгэгдсэн байна.
Тус дүүргийн цагдаагийн газрын нэгдүгээр хэлтсээс шалгахад урьдчилсан байдлаар насанд хүрсэн хүмүүс маргалдаж байгаад 3 сартай эмэгтэй хүүхдийн биед гэмтэл учруулж, улмаар охин эмнэлгийн тусламж үйлчилгээ авч байгаад амь насаа алдсан хэрэгт мөрдөн шалгах ажиллагаа явуулж байна гэж ЦЕГ-аас мэдээллээ.
Цагдаагийн байгууллагын 102 тусгай дугаарт 2023 оны 11 дүгээр сарын 30-ны өдөр нийт 1693 дуудлага, мэдээлэл бүртгэгдсэнээс зөрчлийн шинжтэй 1293, гэмт хэргийн шинжтэй 95 дуудлага, мэдээлэл байна.
Мөн гэмт хэргийн шинжтэй 53 үйлдлийг шуурхай илрүүлж, урьд өмнө бүртгэгдсэн 16 хэргийг нөхөн илрүүлжээ.
