Ерөнхийлөгч У.Хүрэлсүхийн Гадаад бодлогын зөвлөх Э.Одбаяр Монгол-АНЭУ-ын харилцааны талаар мэдээлэл өгөв. Ерөнхийлөгч У.Хүрэлсүх энэ сарын 26-наас ирэх сарын 4-нийг хүртэл Уур амьсгалын өөрчлөлтийн асуудлаарх дэлхийн удирдагчдын дээд түвшний уулзалтад оролцож байна.
-Ерөнхийлөгч У.Хүрэлсүх энэ сарын 29-нд АНЭУ-ын Ерөнхийлөгч, Эрхэм дээд Шейх Мухаммад бин Заид Аль-Нахъянтай албан ёсны уулзалт хийлээ. Уулзалтад тус улсын Засгийн газар, парламентын гишүүд олноороо байлцлаа. Уулзалт эерэг, найрсаг, нөхөрсөг уур амьсгалтай болсон. Мөн Ерөнхийлөгчийн Абу Даби хотод буудалласан зочид буудлын ханыг төрийн сүлд, монгол бичгээр бичсэн үгсээр гэрэлтүүлсэн нь хоёр орны харилцааны түвшинг илтгэнэ. Хоёр орны харилцаа хөгжих эерэг суурь бий болсон.
АНЭУ-ын Ерөнхийлөгч ойрхон, нөхөрсөг харилцаатай байя, ахан дүүс шиг байя гэсэн мессежийг өгсөн. Энэ нь хоёр орны харилцаанд чухал ач холбогдолтой. Ер нь дипломат харилцаа хүн хоорондын харилцаан дээр тогтдог. Хоёр орны Ерөнхийлөгч нөхөрсөг харилцаа тогтоох нь бусад салбарын харилцаанд шууд нөлөөлдөг.
Газрын тос боловсруулахаас гадна манай үл хөдлөх, банк, санхүүгийн салбарт хөрөнгө оруулаарай хэмээн хөрөнгө оруулагчдыг идэвхтэй урьж байна.
-Хоёр улсын Гадаад харилцааны яамд харилцан ойлголцлын санамж бичиг зурсан. Та энэ талаар мэдээлэл өгөөч.
-Хоёр яамны мэргэжилтнүүдээс бүрдсэн ажлын хэсэг байгуулагдан, мэдээллээ байнга солилцдог болно. Ийм механизм бидэнд байгаагүй.
-Манай улс Булангийн орнуудтай ямар харилцаатай байдаг вэ?
-АНЭУ-д хоёр жилийн өмнө ЭСЯ-аа нээж, манай элчин сайд байнга ажиллаж байна. Кувейттэй бид уламжлалт харилцаатай. Саудын Араб энэ бүс нутагтаа хамгийн нөлөөтэй, хамгийн том орон. Катар руу шууд нислэгтэй болсон. Катар энэ бүсдээ ардчилсан, хөгжиж буй орон юм.
Саяхан дэлхийн хөл бөмбөгийн аварга шалгаруулах тэмцээнийг зохион байгууллаа. Энэ бүс нутгийн орнууд эдийн засгийн чадамжтай болсон тул олон улсын томоохон уралдаан, хурал зэргийг эх орондоо зохион байгуулж, дэлхий нийтэд танигдах зорилгоор ажиллаж байна. Эдийн засгаараа гадаад бодлогоо идэвхтэй дэмждэг. Газрын тос боловсруулахаас гадна манай үл хөдлөх, банк, санхүүгийн салбарт хөрөнгө оруулаарай хэмээн хөрөнгө оруулагчдыг идэвхтэй урьж байна.
-АНЭУ ямар гадаад бодлого баримталдаг улс вэ?
-Монголтой төстэй гадаад бодлоготой улс. Хөрш орнуудын харилцаа нь гадаад бодлогынх нь тэргүүлэх чиглэл байдаг. Саудын Араб, Катар, Бахрейн, Оман гэх мэт хөрш болон зэргэлдээ оршдог орнуудтай тогтоосон харилцаа нэгдүгээрт бичигдэнэ. Хоёрдугаарт, бусад орнууд гэж ангилдаг.
Абу Дабигийн хөгжлийн сан нь хөгжиж буй орнуудад туслалцаа үзүүлдэг. Энэ сангаар дамжуулан хөгжлийн хамтын ажиллагаагаа явуулдаг. Ингэхдээ зээл өгөх, тусламж үзүүлээд өнгөрөх биш улс орнуудтай харилцан ашигтай хамтран ажиллах эрмэлзэлтэй. Бонд авах, банкуудын хувь эзэмших гэх мэт арга замаар хөрөнгө оруулдаг юм байна.
АНЭУ тэнцвэртэй, харилцан ашигтай гадаад бодлого явуулдаг. Олон улсын тавцанд аль нэг талыг, аль нэг улсыг хэт дэмждэггүй. Хэдий эдийн засгийн хүчин чадлаараа өндөр үзүүлэлттэй ч газар нутаг жижиг, хүн ам цөөтэй орон тул бие даасан гадаад бодлого явуулдаг. Үүгээрээ манай улсын гадаад бодлоготой ижилхэн. Манай гадаад бодлогын тэргүүлэх чиглэл нь хоёр хөрштэйгээ харилцах юм. Гэхдээ манай гадаад бодлогын гол цөм нь тэнцвэртэй бодлого явуулах. АНЭУ бүс нутагтаа тэнцвэртэй бодлого явуулах, шашин хоорондын мөргөлдөөн болоход аль нэг талыг дэмжихгүй байх, энхийг эрхэмлэсэн гадаад бодлого явуулдаг.
-Танд баярлалаа
