“Twitter” нийгмийн сүлжээний компани хэрэглэгчдэд жиргээгээ нийтэлснийхээ дараа засварладаг боломжийг олгох тохиргоог гаргахаар ажиллаж байгаагаа мэдэгджээ.
Тус компанийн удирдах зөвлөлийн шинэ гишүүн, “Tesla” компанийн тэргүүн Илон Маск “Twitter”-ийн дагагчдаасаа ийм тохиргоо хэрэгтэй эсэх талаар санал асуулга явуулсны дараа дээрх мэдэгдэл гарсан байна.
“Twitter”-ийн зарим хэрэглэгчийн хувьд ийм тохиргоог нэвтрүүлэхийг удаан хугацааны турш уриалсаар ирсэнтэй зэрэгцэн үүнийг хэрхэн хэрэгжүүлэх талаар санаа зовниж буйгаа ч мөн олон нийт илэрхийлсээр иржээ. Тус компанийн мэдээлснээр, жиргээгээ засварладаг тохиргоог ойрын саруудад туршиж эхэлнэ.
Нийгмийн сүлжээний компанийн олон нийттэй харилцах багийн жиргээнд, “Одоо хүн бүр л энэ талаар асууж байна ... тийм ээ, бид өнгөрсөн жилээс хойш засварлах функц дээр ажиллаж байна” хэмээгээд, санал асуулгаас санаа аваагүй гэдгээ мөн онцолсон байна.