Улсын Нэгдүгээр Төв Эмнэлэг (УНТЭ)-ээс “Эмнэлзүйн ховор тохиолдлын үндэсний IV чуулган“-ыг зохион байгуулав.
Манай улсын эмнэлзүйн салбарт тохиолдсон ховор тохиолдол, түүний оношилгоо, эмчилгээний үр дүнг эмч нарт таниулах, эмнэлзүйн ховор тохиолдлын санг бүрдүүлэх, нотолгоонд суурилсан эмнэлзүйн анагаах ухааныг хөгжүүлэх зорилготой тус чуулганд аймаг, дүүргийн 100 орчим эмч, мэргэжилтэн оролцсон байна.
Энэ үеэр УНТЭ-ийн Эмнэлзүй эрхэлсэн дэд захирал О.Баярмаа "Эмнэлзүйн ховор тохиолдол гэдэг нь эрүүл мэндийн салбарын заавал оношилж, эмчлэх шаардлагатай өвчнүүдийн нэг бөгөөд ДЭМБ-аас 2023 онд гаргасан тодорхойлолтоор 100,000 хүн амд 65-аас доош, Европын Холбооны улсад 100,000 хүнд 50-иас доош, АНУ-д 60-аас доош буюу 0.05-0.65 хувьд нь илэрдэг өвчин эмгэгийг ховор тохиолдол хэмээн үздэг.
Одоогийн байдлаар дэлхий нийтэд 300 сая орчим хүн эмнэлзүйн ховор тохиолдлын эмгэгээр өвчилж, оношлогдсон байна.
Эдгээр өвчний 70 хувь нь генийн буюу удмын шалтгаантай. Үүнээс гадна гуравны хоёр нь хүүхдэд тохиолддог бөгөөд эмнэлзүйн ховор тохиолдлын эмчилгээ нь төвөгтэй, 95 хувьд нь эмчилгээ байдаггүй" гэлээ.
Мөн тэрбээр "Эмнэлзүйн ховор тохиолдлыг оношлох, илрүүлэх тохиолдол жилээс жилд нэмэгдэж байна. Энэ нь шинэ технологи, лабораторийн оношилгооны төрөл нэмэгдсэнээс гадна манай эмч, мэргэжилтнүүдийн чадвар хэрхэн дээшилснийг харуулж буй юм.
Түүнчлэн эмч нар маань маш их уншиж, судалдгийг харахад таатай байгаа учраас бид энэ бүх туршлагаа хуваалцах зорилгоор энэхүү чуулганыг дөрөв дэх жилдээ зохион байгуулж байна” хэмээсэн юм.
Энэ удаагийн чуулганд шилдэг 20 илтгэлийг шалгаруулжээ.
Чуулганы үр дүнг шүүгчдийн дүгнэлтэд үндэслэн оролцогч, сонирхогчдын хамрагдалтыг нэмэгдүүлэх, эмнэлгийн мэргэжилтний төгсөлтийн дараах сургалтад бүрэн хамруулах, Монголд тохиолдсон ховор өвчин, эмгэгийг бүртгэж, олон улсын тавцанд таниулах үйл ажиллагааг зохион байгуулж, улам хөгжүүлж ажиллахаар цаашдын зорилгоо тодорхойлсон байна.
Эх сурвалж: Эрүүл Мэндийн Яам
