Иргэн Д хардалтын улмаас “******* зар” нэртэй фэйсбүүкийн зарын группд нөхөр О-той нь өмнө хамтран амьдарч байсан М-ийн зургийг оруулан “завхай...” гэх мэтээр түүний нэр төр, алдар хүндэд халдсан илт худал мэдээллийг олон нийтэд тараасан гэх гэмт хэрэгт холбогджээ.
Тэрбээр мөрдөн шалгах ажиллагааны шатанд “Би нэг л удаа фэйсбүүкт юм бичсэн, одоо тэр бичсэн зүйл маань байхгүй, устгасан. Би тэр нийтлэлийг уурандаа бичсэн. Уурандаа түүний зургийг оруулж нийтлэл бичсэн нь миний буруу байж. Энэ нь гэмт хэрэг болно гэж бодоогүй, би маш их харамсаж цочирдож байна” гэж мэдүүлжээ.
Шүүхээс иргэн Д-г Эрүүгийн хуулийн тусгай ангийн 1.14 дүгээр зүйлийн 1 дэх хэсэгт зааснаар “Хүний нэр төр, алдар хүндэд халдсан, худал мэдээллийг олон нийтэд тараасан” гэмт хэрэг үйлдсэн гэм буруутайд тооцжээ. Улмаар нэг сарын хугацаагаар зорчих эрхийг хязгаарлах ял оногдуулсан байна.
Гэхдээ түүнийг гэм буруугаа сайн дураар хүлээн зөвшөөрсөн, хохирогч гомдол, саналгүй, нэхэмжлэх зүйлгүй тул ялаас чөлөөлж өгнө үү гэсэн өмгөөлөгчийн саналыг шүүх хүлээн авч 1 сарын хугацаагаар зорчих эрхийг хязгаарлах ялаас чөлөөлж шийдвэрлэжээ.
Эх сурвалж: Сэлэнгэ аймаг дахь Сум дундын эрүүгийн хэргийн анхан шатны шүүх
