Улаанбаатар хот, Хан-Уул дүүрэг. 14 дүгээр хороо, Өлзийтийн гудамж дахь гэрээсээ иргэн С шөнө дунд гараад алга болжээ.
Аврах ангийн алба хаагчид энэ сарын 22-ны өдрийн 16:15 цагаас эхлэн эрэн хайх ажиллагааг зохион байгуулан ажиллаж мөн өдрийн 16:44 цагт гэрээс нь зүүн зүгт 1 км зайд, уулын бэлд цасанд дарагдсан байдалтай нас барсан байсныг олж, цогцсыг тус дүүргийн Цагдаагийн 2 дугаар хэлтэст хүлээлгэн өгсөн байна.
Цаг уурын байгууллагын ирүүлсэн мэдээгээр өнөөдөр буюу 23-нд Халх голын сав нутгаар цас орж, цасан шуурга шуурч, хүйтний эрч эрс чангарахыг онцгойлон анхааруулж байна.
Сүхбаатар аймгийн нутгаар баруун хойноос салхи секундэд 6-11 метр, Дорнод аймгийн нутгаар секундэд 4-9 метр, Халх голын сав газраар секундэд 12-14 метр хүрч ширүүснэ. Агаарын температур шөнөдөө Халх голын сав нутгаар -28....-33 градус, бусад хэсгээр -24...-29 градус, өдөртөө -15....-20 градус хүйтэн байна.
Иймд:
- Малчид, иргэд, тээвэрчид та бүхэн дулаан хувцаслах,
- Хол, ойрын замд гарахдаа автомашины бэлтгэл, бэлэн байдлыг хангах,
- Малчид малаа ойрын бэлчээрт бэлчээх,
- Бага насны хүүхэд, өндөр настан, хөгжлийн бэрхшээлтэй иргэдийг харгалзах хүнгүй үлдээхгүй байхыг зэргээр болзошгүй эрсдэлээс урьдчилан сэргийлэхийг ЗӨВЛӨЖ байна.
Хэрвээ та төөрсөн, байгаа газрынхаа хаягийг мэдэхгүй тохиолдолд гар утсандаа суулгасан “what3words” апп-г ашиглан 3 үгт хаягаа ирүүлснээр байршлаа мэдээлэх боломжтой юм. Энэхүү аппликейшныг гар утасны төрлөөс хамааран Playstore болон Appstore-оос татаж суулган ашиглаарай.
