Бид Улаанбаатар хотын нэгэн хувийн сургуульд эцэг эхчүүд нь хүүхдийнхээ үдийн хоолны чанарыг сайжруулахаар хамтарч ажиллах хүсэлт тавьсаны төлөө нэг сурагчийг сургуулиас хөөсөн тухай мэдээлсэн. Тодруулбал, сурагчид эцэг эхдээ үдийн хоолны махны амт муухай байдаг, хөрсөн хоол өгдөг зэрэг асуудлуудыг учирласан байна.
Иймд 30 хүүхэдтэй тухайн ангийн 25 эцэг эх нэгдэж сургуулийн захиргаанд үдийн хоолыг сайжруулахад хамтарч ажиллах хүсэлт тавьсан аж. Гэтэл тус сургуулийн захиргаанаас сургалтын үйл ажиллагаа алдагдуулсан, турхирсан хэмээх үндэслэлээр албан бичгийг төлөөлөн өгсөн хүний хүүхдийг сургуулиас нь хөөсөн байгаа юм. Тэгвэл бид энэ асуудлын мөрөөр хаана, хаана ямар процесс үргэлжилж байгаа тухай болон сурагчаа хөөсөн "Оюунлаг" сургуулийн талаарх зарим мэдээллийг хүргэж байна.
"Оюунлаг" сургууль үдийн хоолны чанарыг нь шүүмжилсэн сурагчаа хөөжээ
Тэгвэл тухайн сургууль Нийслэлийн Баянзүрх дүүрэгт байрлах "Оюунлаг" сургууль юм байна. Эх сурвалжийн мэдээлж буйгаар энэ кэйс тухайн сургуулийн үдийн хоолтой холбоотой хоёр дахь асуудал болж таарч байна. Эргэн сануулбал, өнгөрөгч есдүгээр сард тус сургуулийн 10 хүүхэд сургуулийнхаа цайны газрын мантуун буузанд хордож зургаа нь эмнэлэгт хэвтэн эмчлүүлсэн тохиолдол гарч байв. Харин энэ удаа үдийн хоолны амт чанар муу, таалагдахгүй байгаа тухайгаа эцэх эхдээ хэлснийхээ төлөө 11 настай охин сургуулиасаа хөөгдлөө.
-Охины ээж хүүхдийнхээ зөрчигдсөн эрхийг сэргээлгэхээр 5 байгууллагад гомдол гаргажээ-
Дээрх асуудлын хүрээнд сурах эрх нь зөрчигдсөн хүүгийн ээж Хүний эрхийн үндэсний комисс, Баянзүрх дүүргийн боловсролын хэлтэс, Нийслэлийн гэр бүл, хүүхэд, залуучуудын хөгжлийн газар болон Нийслэлийн боловсролын газарт гомдол гаргажээ. Иймд бид зарим байгууллагаас дараах мэдэээллүүдийг тодруулав.
Хүний эрхийн үндэсний комисс
"Охины кэйстэй холбоотой гомдол бидэнд ирсэн. Шалгаж эхлэх зөвшөөрлийг өнөөдөр л цохсон тул холбогдох ажил хараахан эхлээгүй байна. Бид 30 хоногийн дотор хүний эрхийн зөрчил мөн эсэхийг шийдвэрлэсний дараа тодорхой мэдээллийг өгч болно."
Баянзүрх дүүргийн боловсролын хэлтэс
"Манай хэлтэст энэ асуудлаар хандсан зүйл байхгүй. Гэхдээ Нийслэлийн боловсролын газраас манайх руу шилжүүлж байгаа гэдгийг өнөөдөр албан бусаар сонссон. Манай чиг үүрэг бол сургалтын чанарт хяналт тавих, бусдаар хүүхдийн эрхийн асуудал дээр ажилладаггүй. Энэ кэйс дээр манайх хамтарсан багийн бүрэлдэхүүнд орж ажиллах боломжтой"
-Сурагчаа хөөсөн "Оюунлаг" сургууль байгуулагдаад найман жил болж байна-
Ерөнхий боловсролын Оюунлаг сургууль анх 2015 онд байгуулагдаж байжээ. Тус сургууль ашгийн төлөө бус үйл ажиллагаатай бөгөөд эзэмшигчээр Доржпүрэвийн Батсайхан гэж хүн бүртгэлтэй байна.
Сурагч охины ээж: Охины маань сэтгэл санаа таагүй байгаа, сэтгэлзүйчид хандана
Охины ээж: "Охины маань сэтгэл санаа сайнгүй байгаа. Сэтгэлзүйчээс зөвлөгөө авна. Бид өөр сургуульд орохоор хайж байгаа ч хувийн болон улсын суургуулиуд бүгд дүүрсэн, олдохгүй байна. Миний хувьд охиныхоо сурч байсан сургуулийг нэрийг одоогоор хэлэх боломжгүй. Учир нь охинд маань хүндээр тусна гэж бодож байна. Ямартай ч Хүний эрхийн үндэсний комисс, Баянзүрх дүүргийн боловсролын хэлтэс, Нийслэлийн гэр бүл, хүүхэд, залуучуудын хөгжлийн газар болон Нийслэлийн боловсролын газарт гомдол гаргасан" гэв.
Харин сургуулиасаа хөөгдсөн 11 настай сурагч охин сурах эрх нь зөрчигдөж байгаа асуудлаар НҮБ-ын суурин төлөөлөгчид хандаж захидал бичжээ. Тэрбээр захидалдаа сургуулиасаа хөөгдөж, хичээлээсээ хөндийрсөн. Мөн найзуудтайгаа уулзаж чадахгүй, ганцаардаж байгаа тухайгаа учирласан байна. Түүний захидалдаа,
ХҮНДЭТ НҮБ-ЫН ХҮҮХДИЙН САНГИЙН СУУРИН ТӨЛӨӨЛӨГЧ НОЁН ЭВАРИСТЕ КОУАССИ-KОМЛАН ТАНАА
"Намайг …… гэдэг. Би 11 настай, эмэгтэй. Би сургуульдаа 6 жил амжилттай суралцаж байсан. Гэвч хичээлийн жилийн эхний улирлын амралтаар сургуулиасаа хөөгдөөд одоо сургууль, найзгүй, ганцаардаж, сэтгэл минь өвдөж байна. Би сургуулийн болон ангийн найзуудаа маш их санаж байна. Манай эцэг эх надад илүү сайн сургууль хайж байгаа ч олоогүй байна. Тэд надад туслуулахаар Хүүхдийн тусламжийн утас 108 руу залгасан. Ээж минь сургуулийн хоол өөх тос ихтэй, муухай амттай махтай, хүйтэн, эрүүл бус хоол байгаа талаар миний болон ангийн найзуудын дуу хоолойг СУРГУУЛИЙН ЗАХИРГААНД хэлсэн учир СУРГУУЛИЙН ЗАХИРАЛ намайг сургуулиас хөөсөнг анх сонсоод би чихэндээ итгээгүй бас маш их цочирдсон.
-Хоолоо гэрээсээ авчирсан хүүхдүүдийг сургалтын менежер цайны газарт оруулдаггүй. Энэ нь бидэнд сургууль дээрээ гадуурхагдаж байгаа мэт санагдсан-
Манай гэр сургуулиас хол учир би хотын түгжрэлээс өмнө гэрээсээ 6:50 цагт гарч сургууль дээрээ 7:45-аас 16:00 цаг хүртэл байдаг. Тиймээс би сургууль дээрээ өдрийн хоол идэх шаардлагатай байсан ч, хоол эрүүл бус байсан. Олон хүүхдүүд эцэг эхдээ эрүүл бус өдрийн хоолны тухай хэлж, гэрээсээ хоол авчирч эхэлсэн. Гэвч гэрээсээ хоолтой ирсэн хүүхдүүдийг СУРГАЛТЫН МЕНЕЖЕР сургуулийн цайны газарт оруулахыг зөвшөөрөхгүй коридорт идэхийг шаарддаг. Энэ нь надад болон миний найзуудад сургууль дээрээ гадуурхагдаж байгаа мэт санагдсан. Миний ээж таныг Монгол улсын олон хүүхдүүдэд тусалдаг гэж хэлсэн. Сургуулийн захиргаа хүүхдүүд бидэнд сайхан хандаж, биднийг хүндлээсэй гэж би хүсч байна.
Та сургуульд эрх нь зөрчигдөж байгаа найзуудыг минь хамгаалахад тусалж чадах уу" гэжээ. Мөн тэрбээр өөрт төрж буй мэдрэмжээ зурж, захидалдаа хавсаргасан байна.
Энэ мэдээнд өгөх таны үнэлгээ
