Хүүхэлдэйн театрын шинэ уран бүтээл "Манжин" хүүхэлдэйн жүжиг маргааш нээлтээ хийнэ. Орос ардын үлгэрээс сэдэвлэсэн энэхүү жүжгийн найруулагчаар Г.Гандөш ажиллажээ. Гурваас дээш насныхан үзэх боломжтой бөгөөд 40 минутын хугацаанд үргэлжилнэ.
Маргааш нээлтээ хийж, энэ сарын 19-нд 11.00, 15.00 25-ны 11.00, 26-ны 11.00, 13.00 цагаас мөн толилуулна.
Жүжгийн танилцуулга
Эрт урьдын цагт тариачин өвгөн эмгэний хамт амьдран суудаг байжээ. Өвгөн амтат ногоо тарьж “Аварга ногоочид”-ын уралдаанд жил бүр оролцдог бөгөөд энэ жил ч мөн адил оролцохоор шийдэн маш том ногоо ургуулж байтал будаа тариа, үр үндсээр хооллодог сахилгагүй хулгана тарьсан ногоог нь сүйтгэчхэв. Өвгөн тэмцээнд оролцож чадахгүй болсондоо сэтгэлээр унахыг харсан муур, нохой, мөн зуны амралтаараа өвөөгийндөө ирсэн ач охин гурав сахилгагүй хулганыг барихаар хичээнэ.
Харин хүнсний ногоо идэх дургүй ач охин өдөр бүр хоолныхоо ногоонуудыг ялган хулганы үүрний дэргэд тавьсан нь сахилгагүй хулганыг эрүүл чийрэг, хүч чадал ихтэй болгож орхив.