Нийслэлийн нийтийн тээврийн парк шинэчлэлтийн хүрээнд оруулж ирсэн ногоон өнгийн автобуснууд ашиглалтын шаардлага хангаагүй тул буцаахаар болсон тухай албаныхан мэдээлж буй. Энэ асуудалд гаалийн байгууллага хууль дүрмээ мөрдөж ажиллаагүй, шалгаж оруулаагүй гэх шүүмжлэл өрнөөд буй.
Гаалийн ерөнхий газрын Хуулийн хэлтсийн дарга Ч.Тамираа “Daewoo маркийн автобусыг Замын-Үүд дэх хилийн боомтоор ирж ирэхэд нь гаалийн байгууллага хуульд заасан чиг үүргийн дагуу хянаж, шалгасан. Дагалдах бичиг баримтууд, тээврийн хэрэгслийн нарийвчилсан үзлэг шалгалтыг хийгээд гаалийн хууль тогтоомжийн дагуу улсын хилээр нэвтрүүлэх зөвшөөрлийг олгосон.
Гэхдээ тээврийн хэрэгслийн бүрэн бүтэн болон аюулгүй байдлын хяналт, шалгалт ингээд дуусдаггүй. Гаалийн байгууллага зөвшөөрөл олгож улсын хилээр нэвтрүүлсний дараа Авто тээврийн оношилгооны төвд нарийвчилсан үзлэг, шалгалт хийдэг. Тиймээс эдгээр автобусын гаалийн хяналт шалгалт хуулийн дагуу хийгдэж, хилийн боомтоор нэвтэрсэн гэдгийг хэлье” гэв.
