Энэ сарын эхээр Израилын зэвсэгт хүчин Газа хотыг бүхэлд нь бүслэн авч, “зүрхэнд” нэвтэрснээ зарласан. Хамас бүлэглэлийн үйл ажиллагаа явуулдаг төв хэсэг нь Газа хот гэж үзсэн тул тус бүс рүү довтолж байгаа гэсэн юм.
Тэгвэл Израилын дайралтын улмаас үйл ажиллагаа нь зогсоод байсан Газа хотын төв эмнэлэг болох Аль-Шифаг Хамас бүлэглэл нуувчаа болгон ашиглаж байгааг АНУ-аас мэдэгдсэн байна.
Тодруулбал Аль-Шифа эмнэлгийн доор Хамас бүлэглэлийн удирдлагын төв байгаагаас гадна зэр зэвсэг хадгалах байдлаар эмнэлгийг ашиглаж буйг Үндэсний аюулгүй байдлын хэвлэлийн төлөөлөгч мэдэгджээ.
Харин үүнийг Хамас бүлэглэл үгүйсгэж байгаа аж.
Сүүлийн өдрүүдэд Израилын армийн гол бай нь Али-Шифа эмнэлэг болсон. Олон мянган хүн уг эмнэлэгт хоргодож буй хэмээн үзэж байгаа юм.
Хэдийгээр Израилын зүгээс уг эмнэлгийг зориуд онилж дайраагүй хэмээн мэдэгдсэн ч үйл ажиллагаа нь зогссоны улмаас олон хүн амиа алдсан бөгөөд тэдний дунд гурван нярай байсныг эмнэлгийн ажилчид хэлсэн.
