УИХ-ын Инновац, цахим бодлогын байнгын хороо “Цахим систем ашиглан иргэдийн оролцоог хангах, санал авах журам” тогтоолыг энэ оны нэгдүгээр сард баталсан.
Тус тогтоолоор иргэд нийтийн өргөдөл санаачлах, нийтийн өргөдлийг дэмжих, Их хурлын түвшинд хэлэлцүүлэн шийдвэрлүүлэх боломжтой болсон. Тодруулбал, иргэд D-Өргөдөл буюу “Нийтийн цахим өргөдөл, гомдлын систем”-ээр дамжуулан хуульд оруулах саналаа хэлэх, санал өгөх боломжтой болсон билээ.
УИХ-ын дарга Г.Занданшатар өнгөрсөн сарын 17-нд НӨАТ-ын буцаан олголтын хоёр хувийг таван хувь болгох асуудлаар иргэдийн санал авч эхэлсэн. Тус саналыг зургаа хоногийн хугацаанд 100 гаруй мянган иргэн дэмжсэн. Тиймээс УИХ-ын Төсвийн байнгын хороо тус асуудлыг судлах ажлын хэсэг байгуулаад байгаа билээ.
Гэхдээ НӨАТ-ын буцаан олголтыг таван хувь болгох асуудлыг 100 гаруй мянган иргэн дэмжсэн ч Их хурлын түвшинд маргаан дагуулаад байгаа. Өөрөөр хэлбэл, НӨАТ-ын буцаан олголтыг таван хувь болгох асуудал ганц Сангийн сайд, УИХ-ын даргын хоорондын асуудал биш болоод буй. УИХ-ын гишүүд тэр дундаа УИХ дахь МАН-ын бүлэг тус асуудал дээр байр сууриа нэгтгэж чадахгүй байгаа. Тиймээс УИХ-ын Инновац, цахим бодлогын байнгын хороо “Цахим систем ашиглан иргэдийн оролцоог хангах, санал авах журам”-ын тогтоолд өөрчлөлт оруулахаар болж, ажлын хэсэг байгуулжээ. Учир нь УИХ-ын гишүүдийн Эрүүгийн хууль, Татварын хуульд өөрчлөлт оруулах хуулийн төсөл санаачлах эрхийг нь хязгаарласан. Тиймээс иргэдээс ч дээрх асуудлуудаар санал авч болохгүй гэж үзэж байгаа бөгөөд тогтоолд өөрчлөлт оруулж, D-Өргөдөл буюу “Нийтийн цахим өргөдөл, гомдлын систем”-ээр дамжуулан иргэдээс Эрүүгийн хууль болон Татвар, төсөвтэй холбоотой асуудлаар санал авахгүй болох юм байна.
Энэ талаар УИХ дахь МАН-ын бүлгийн дарга Д.Тогтохсүрэн хэлэхдээ “Бид D parlament гээд цахим парламенттай болсон. Үүгээр ирж байгаа иргэдийн саналыг Их хурал заавал үзэж, судалж, боломж байвал шийдэж байх ёстой.
Гэхдээ цаашдаа татвар, төсөв, Эрүүгийн хуультай холбоотой асуудлаар D parlament-д санал асуулга явуулахгүй байх ёстой. Их хурал D parlament-ын журмыг өөрчлөх чиглэлээр ажиллаж байна. Ойрын үед ярих байх. Иргэдээс чи ямар татвар төлөх вэ, чи ямар ял авах вэ гэж огт асууж болдоггүй. Энэ төрийн бодлогоороо явдаг зүйл. Тиймээс энэ хоёр асуудлаар санал асуулга явуулж болохгүй” гэв.
Хэдийгээр "D parlament"-ын журмыг өөрчлөх ч 100 гаруй мянган иргэний саналыг авсан НӨАТ-ын буцаан олголтыг таван хувь болгох асуудлыг Их хурал хэлэлцэн шийдвэр гаргана. Гэхдээ УИХ ирэх жилийн төсвийг баталсан учрсаас НӨАТ-ын хуульд өөрчлөлт оруулсан ч 2025 оноос хэрэгжүүлнэ. Учир нь Их хурлын төсвийн тухай хуульд улсын төсөв батлагдсанаас хойш төсөвт ачаалал болох хууль баталбал дараа жилийн нэгдүгээр сарын 1-ээс хэрэгжүүлнэ гэж заасан байдаг. Тиймээс Их хурал НӨАТ-ыг таван хувь болгох өөрчлөлтийг хуульд хийсэн ч 2025 оноос хэрэгжүүлж эхлэх юм.
