Монгол Улсын иргэний амь насыг онц хэрцгийгээр хөнөөсөн хэрэгт буруутгагдан цаазын ял авсан Малайзын цагдаа есөн жил Австралийн шоронд хоригдсоны дараа суллагдсаныг тус улсын Засгийн газрын эх сурвалж мэдээлжээ.
Тодруулбал, Австралийн шоронд хоригдож байсан Сирул Азхар Умар болон өөр нэг цагдаагийн ажилтан Азилах Хадри нарыг Малайз улсад Ерөнхий сайд асан Нажиб Разакийн орчуулагч 28 настай Шаарийбуугийн Алтантуяаг хөнөөсөн хэрэгт буруутайг тогтоосны дараа цаазаар авах ял оноосон. Сирул шүүхийн шийдвэр гарахын өмнө Малайзаас зугтсан байна. Гэмт этгээд Малайзаас зугтсаны дараа 2015 оны нэгдүгээр сараас хойш Австралийн цагаачдын хорих төвд хоригдож байсан юм. Түүнийг сулласан нь Австралийн Дээд шүүхээс цагаачдыг тодорхойгүй хугацаагаар баривчлахыг хориглосон шийдвэр гаргасантай холбоотой аж.
Өнгөрсөн ням гаригт Австралийн хэвлэлд мэдээлснээр Сирул хүүтэйгээ Канберра хотод амьдарч байгаа аж. Австралийн цагаачлалын албаныхан энэ талаар ямар нэгэн тайлбар хийгээгүй байна. Малайзын цагдаагийн дээд албан тушаалтан Разарудин Хусаин Сирулыг сулласан тухай мэдээг баталж, цагдаа нар Ерөнхий прокурор болон шүүхтэй шилжүүлэн өгөх хүсэлт гаргах боломжийн талаар ярилцана гэж мэдэгдэв. Австралийн хуулийн дагуу цаазаар авах ял хүлээж байгаа хүнийг шилжүүлэх боломжгүй. Сирулын хамтрагч Азила Малайзад цаазаар авах ялтай хэвээр байгаа.
Монгол Улсын иргэн Ш.Алтантуяа агсны амь насыг хөнөөсөн хэрэг олон жилийн турш улс төрийн дуулианы төвд байсаар ирсэн. Түүнийг 2006 онд Малайзын нийслэл хотын захын ойд амь үрэгдсэн гэж шүүхийн мэдүүлгээр тогтоосон ч түүнийг хөнөөх тушаалыг хэн өгсөн бэ гэсэн асуултад хариулт олдоогүй. Иргэний нийгмийнхэн түүнийг хөнөөсөн нь 2002 онд Малайз Францын хоёр шумбагч онгоц худалдаж авахад орчуулагчаар ажилласантай холбоотой гэж үздэг.
Эргэн сануулахад, 2022 онд Малайзын Дээд шүүхээс Ш.Алтантуяаг агсны гэр бүлд 5 сая малайз ринггит буюу 1.1 сая ам.долларын нөхөн олговор олгох шийдвэр гаргасан юм. Харин Алтантуяа агсны аав С.Шаарийбуу Малайзын Дээд шүүхийн нөхөн олговор олгох шийдвэрийг давж заалдахаа мэдэгдсэн.
