УИХ дахь АН-ын бүлгээс мэдээлэл хийв. Бүлгийн дарга УИХ-ын гишүүн Д.Ганбат “УИХ-ын дарга өнгөрсөн долоо хоногт Монгол Улсын өрийн талаар ярьсан. Үнэндээ өрийг ийм түвшинд хүргэсэн хүмүүс юун 2030 он, 2026 он гэхэд л Монголоос хөөгдөнө. Өрийн дарамт ямар уршигтай байдаг вэ. 2010 онд Тажикстан улс өрийн дарамтаас салахын тулд Уулын Бадахшаныхаа тодорхой газар нутгийг Хятадад шилжүүлсэн. Шри Ланк усан боомтоо 99 жилийн хугацаатай Хятадад хүлээлгэж өгчээ. Африкийн Жиботи улс мөн Хятадад усан боомтоо өгсөн гээд өрийн уршгийн жишээ олон байна. Гэтэл хэн ч энэ тухай ярихгүй байна.
Монгол Улсын нэг иргэнд 30 сая төгрөгийн өр ногдож байна. Шри-Ланка улс дампуурлаа зарлачихлаа. Монголд ч энэ байдал давтагдахгүй гэх арга алга. Өрийн дарамтад орсон дараагийн Улсаар Монголыг нэрлэж байна. Тиймээс Засгийн газар өр үйлдвэрлэхээ зогсоох хэрэгтэй.
Мөн Эрүүгийн хэргийг хянан шийдвэрлэх хуулийн төслийг УИХ хэлэлцэж батлана. Гэвч хэрхэвч дэмжиж болохгүй заалтууд байна. Тухайлбал, хэвлэлийнхнийг доромжлох гүтгэх гэдэг заалтаар эрүүгийн хариуцлага хүлээлгэх заалт оруулж ирж байна. Жишээ нь, намайг данх гэж хэлдэг. Хэлж л байг л дээ. Улс төрийн албан тушаалтан, эрх мэдэлтэй хүмүүсийг хэлж байг. Шилэн тод байх хэрэгтэй. Мөн Эрүүгийн хэргийг хянан шийдвэрлэх тухай хуулийн 12.1.1, 12.3.1 зэрэг заалтаар мөрдөгч иргэнийг шууд дуудан ирүүлэхээр туссан байгаа юм. Хэнийг л бол хэнийг хэдэн өдрөөр цагдаагийн үүдэнд суулгахаар болж байна. Энэ бол хүний эрхийг зөрчсөн заалт” гэлээ. Мөн тэрээр Бүлгийн хурлын гурван гишүүнтэй хийснээ ирц хүрсэн хэмээн цайруулав. Учир нь бүлгийн зарим гишүүн гадаадад болон орон нутагт томилолттой байгаа гэв.
Хувийн хэвшлээ дэмжээч ээ
УИХ-ын гишүүн С.Одонтуяа:
Монгол Улсын Засгийн газар өрийн аргачлалыг тооцохдоо зориуд хүмүүсийн төөрөгдүүлж байна. Жишээ нь, Дэлхийн банк “Монгол Улсын өр хамгийн ноцтой түвшинд хүрсэн байна. ДНБ-ний 221 хувьд хүрчихээд байна” гэж манайх өрийн аргачлалаар Монгол Улсын өр ноцтой хэмжээнд хүрээгүй, хуулийн хүрээнд байна. Төрийн өмчит компаниудын өрийг Засгийн газрын өрөнд тооцохгүй гээд хасаад явчихаж байгаа юм. Бид өрийн түвшин ноцтой байгаа гэдгээ хүлээн зөвшөөрөх хэрэгтэй. Төрийн өмчит компаниудаа хувьчлах, нээлттэй хувьцаат компани болгох боломж байна. Иргэдийн гар дээр болон хадгаламжинд мөнгө байна. Үүнийг Эрдэнэт, Оюутолгой хувьцааг нь арилжаалах замаар мөнгө босгох боломж байна. Эдийн засаг агшиж байхад инфляц маш өндөр түвшинд хүрчихээд байна. Тиймээс хувийн компаниудаа дэмжээч ээ. Яаралтай арга хэмжээ авах шаардлагатай болчихоод байна. Эрүүгийн хэргийг хянан шийдвэрлэх хуулийн төсөлд мөрдөгч гэж орж ирсэн байгаа нь хүний эрхийг ноцтой зөрчиж байна гэж бид үзэж байгаа юм гэлээ.