Зэвсэгт хүчний 326 дугаар ангид цэрэгт татагдсан 21 настай оюутан нас барсан харамсалтай хэрэг өнөө өглөө гарчээ. Ар гэрийнхэн нь одоо цэргийн ангийн гадаа байгаа бөгөөд тэднийг оруулахгүй байгаа юм. Тэгвэл ЗХЖШ, ХЗЦК-аас цэрэг нас барсан асуудлаар дөнгөж сая мэдээлэл хийлээ.
ЗХЖШ-ын Хуурай замын цэргийн командлагч, баригадын генерал Ч.Цогтжаргал “Өнгөрсөн шөнө Зэвсэгт хүчний 326 дугаар ангид харамсалтай зүйл боллоо. Хэргийг хууль хяналтын байгууллага шалгаж байна. Хэрэг дээр манай дотоод хяналт шалгалт ажилласан. Албаныхаа хүрээнд хэргийн үнэнийг тогтоохоор ажиллалаа.
Өглөө 06:30 цаг орчимд командлалын генерал над руу ярьсан. “Босох команд өгсний дараа талийгаач босохгүй байсан учраас очоод үзэхэд нас барсан байдалтай байлаа. Бид эмнэлэг, цагдаа холбогдох хүмүүсийг дуудсан” гэсэн. Тухайн үед шуурхай бүлэг томилж 326 дугаар анги руу явуулсан.
Орой амрах дохио өгсний дараа талийгаач бусад байлдагчдын хамт амарсан байна. Байлдагч нар амарсны дараа заалны гэрлийг унтраагаад жижүүр дээр зөвхөн гэрэл асаж байдаг. Өглөө 06:00 цагт байлдагч нарын бослого эхэлдэг. Бослого эхэлсэн дохио өгөхөд босохгүй байсан учраас байлдагчийг амь насаа алдасныг үүрэг гүйцэтгэж байсан алба хаагчид мэдсэн.
Цагдаагийн байгууллага, Шүүх шинжилгээний байгууллагууд үзлэг шинжилгээгээ хийгээд явсан. Одоогоор цагдаагийн байгууллагынхан ажиллаж байна.
Зэвсэгт хүчний зүгээс ар гэрийнхэнтэй холбогдоод гашуудлыг хуваалцах ажлууд явж байна. Яг одоо цагдаагийн байгууллагын үзлэг шалгалт явагдаж байна. Зарим албан хаагчийг цагдаагийн байгууллага шалгалт явуулж байгаа учир тус анги руу нэвтрүүлэх боломжгүй байна. Энэ мэдээллийн дараа бид Зэвсэгт хүчний 326 дугаар ангид очиж, байлдагчийн ар гэрийнхэн болон хэвлэлийнхэнтэй уулзах болно.
Ямар шалтгаанаар амиа алдсаныг хяналт шалгалт явуулсны дараа цагдаагийн байгууллага тогтооно. Бидний зүгээс ямар нэг дүгнэлт гаргах боломжгүй." гэлээ.
