Нийслэл хотынхны халуун сэдвийн нэг нь автозамын түгжрэл. Үүнтэй холбогдон яригдах агуулга нь авто зогсоолын хүртээмж байж таарна. Маргах аргагүй нэг үнэн гэвэл Улаанбаатар үндсэндээ авто зогсоолгүй хот. Байгаа ганц нэг нь ихэнхдээ байгууллага, аж ахуйн нэгжийнх.
2022 онд холбогдох байгууллагуудын хамтран хийсэн судалгаагаар нийслэлийн төвийн зургаан дүүрэгт 178 га талбайд 62,057 автомашины зогсоол байна. Үүнээс зөвхөн 31,623 нь олон нийтийн зориулалттай ажээ. Тооцоогоор Улаанбаатарт өдөрт 400 гаруй мянган машин хөдөлгөөнд оролцдог бөгөөд зогсоол хайж хойш урагш холхисон автомашинууд нь түгжрэлийн бас нэг нэмэлт хүчин зүйл болдог гэдгийг мэргэжлийнхэн тодотгож байгаа юм.
Харин дуулдаж буй сайн мэдээлэл гэвэл 32-ын тойргийн орчимд 300 автомашины зогсоол байгуулж байгаа явдал. Үүнийг мөнөөх талбартэй бүстэй холбоотойгоор байгуулж байгаа бөгөөд тухайн бүсэд ажилладаг иргэд машинаа энэ зогсоол дээр үлдээх дүр зураг харагдаж байгаа. Хотын даргын нэгэнтээ тодотгосноор энэ хүмүүс машинаа энд үнэгүй парклана. Гэвч үнэгүй юм зөвхөн хулганын хавханд байдаг гэх үг бий.
Дэлхийн улс орнууд авто зогсоолын асуудлыг хэрхэн шийдсэн талаар түүвэрлэсэн мэдээллийг хүргэж байна.
АНУ. Бүх намхан барилгууд, таун хаусыг заавал 1-2 гаражийн хамт барьж зарна. Бүх өндөр барилгууд, түүний дотор нийтийн орон сууцны барилгууд нь газар доорх зогсоолтой байх ёстой. Ихэвчлэн 100 айлын орон сууцанд 250 зогсоол төлөвлөгдаөж баригдсан байх ёстой.
Их Британи. Лондонд хотын төвд нэвтрэх төлбөртэй бөгөөд өдөрт 12 фунт (ойролцоогоор 52000 төг) байдаг. Төлбөртэй бүсийн оршин суугчид хашаандаа эсвэл байшингийнхаа хажууд нэг жилийн турш 100 фунт стерлингээр машинаа байрлуулах эрхийг худалдаж авах боломжтой боловч хүртээмжгүйн улмаас тухайн сард нийт өргөдөл гаргагчдын ердөө 20% нь зогсоол авдаг.
Герман.Берлинд хотын төвөөс гаднах гудамжинд зогсоол үнэгүй байдаг. Төвд цагт 1-2 евро. Орон нутгийн оршин суугчид болон ажилчид 3 жилийн хугацаатай зогсоолын зөвшөөрлийг аж ахуйн нэгжүүд160 евро, оршин суугчид 100 еврогоор худалдан авах боломжтой. Бүх бүтээн байгуулагчдад гараж, машины зогсоол бүхий байшин барихыг шаарддаг. Хэрэв зогсоол олгоогүй бол хөгжүүлэгч нэг зогсоолын төлөө 10,000 еврогоос эхлэн шимтгэл төлдөг.
Франц.Парист бүх машинууд байшингийн доорхи газар доорхи зогсоолд байрладаг. Тухайн бүсээс хамаарч 70-130 еврогийн үнэтэй. Ажлын өдрүүдэд гудамжны зогсоол нэг цагт 1.5-4 еврогийн үнэтэй байдаг. Оршин суугаа газарт бол долоо хоногт 3.5 евро.
Польш.Варшавт ажлын өдрүүдэд 1 цаг зогсоолын үнэ ойролцоогоор 3 злот (1400 орчим төг) байдаг.
Италид машины зогсоол нь хотоос хамаардаг. Флоренц хотод нэг шөнө 30 евро хүртэл.
Өмнөд Солонгос. Бүх орон сууцны барилгад нэг айлд 1-ээс доошгүй газар доорх зогсоол байх ёстой. Үүнийг гэр бүлд үнэ төлбөргүй олгодог. 1-ээс дээш бол сард 100-300 доллар төлнө. Гудамжинд цахилгаан шаттай зогсоолын цамхагууд баригдаж байна. Түүний үйлчилгээний үнэ нэг цагт 3-6 доллар эсвэл өдөрт 15 доллар эсвэл сард 120-180 доллар байдаг.
Хятад. Бээжин, Шанхайд илүү эрс арга хэмжээ авч байна. Хувийн машин худалдаж авахаасаа өмнө зогсоол худалдаж авах эсвэл /түрээслэх/ шаардлагатай. Бээжингийн төлбөртэй зогсоол нь 15 минут 2.5 юань.
Доорхи зурагт дэлхийн улс орнуудын авто зогсоолын нэг цагийн хөлсийг харуулсан тул илүү ихийг дурдсангүй.
