Эрчим хүчний сайд Б.Чойжилсүрэн хагас коксын түлшний үйлдвэр дотооддоо барьж байгуулах талаар ярьсан. Гэвч Засгийн газраас түүний төслийг дэмжээгүй. Энэ талаар ЗГХЭГ-ын дарга Д.Амарбаясгалан дараах мэдээллийг өглөө.
Тэрээр ““Эрдэнэс Тавантолгой” ХК-д томилож ажиллаж байсан Бүрэн эрхт төлөөлөгч өнгөрсөн долоо хоногт Засгийн газарт тайлангаа тавьсан. Тайланд, “Тавантолгой түлш” ХХК өөрсдөө төслөө боловсруулаад ЭТТ зөвшөөрлийг нь өгөөд Зүүн үйлдвэр буюу Налайх дүүргийн үйлдвэр дээрээ нүүрс угаах үйлдвэр барих төсөл хэрэгжүүлж эхэлсэн байдаг. Одоогийн байдлаар 40 орчим тэрбум төгрөгийн бүтээн байгуулалт хийсэн. Засгийн газрын БЭТ үйлдвэрийн ажлыг зогсоох шийдвэр гаргаад өнөөдрийг хүрсэн.
Нөгөөх нь, Эрчим хүчний сайд Б.Чойжилсүрэн Засгийн газарт танилцуулсан ч зөвшөөрөл олгогдоогүй хагас коксын түлшний үйлдвэр. 300 орчим сая долларын хөрөнгө оруулалтаар хийгдэх түлшний үйлдвэрийн төслийг санаачилсан ч аль ч шатанд барих зөвшөөрөл олгогдоогүй. Тиймээс Эрчим хүчний сайд хувийн хэвшлийн 100 хувийн хөрөнгө оруулалтаар барих сонгон шалгаруулалт зарлах уу гэдэг асуудлыг Засгийн газарт оруулсан. Эцэслэж шийдээгүй байна. Учир нь, Төр хувийн хэвшлийн түншлэлийн хууль, төрийн худалдан авах ажиллагааны хууль зэргээр урт удаан хугацаанд төр хувийн хэвшил хамтарч ажиллах боломжгүй. Одоогийн мөрдөж байгаа хуулиар 3 жил л хамтарч ажиллах боломжтой. Тэгэхээр гуравхан жилийн хугацаанд хамтран ажиллах нөхцөлөөр 300 орчим сая ам.долларын хөрөнгө оруулалт хийх хувийн хэвшил одоогоор алга. Тиймээс цаашдаа төр хувийн хэвшил урт хугацаанд хамтарч ажиллах боломжийг хууль эрхзүйн орчинд бий болгоно.
Тухайлбал, өнөөдөр хотын цэвэрлэгээ арчилгааны асуудал жил бүр яригддаг. Гэвч жил бүрийн төсөвт тавигддаг багахан төсвөөр дэлхийн стандартад хүрсэн цэвэрлээ үйлчилгээний тоног төхөөрөмж оруулж ирж, үйлчилгээ үзүүлэх боломжгүй юм” гэв.