Даваа гарагийн орой Хятадын зүүн хойд Хэйлунжян мужид спорт заалын дээвэр нурсны улмаас гурван хүний амь үрэгджээ.
Хохирогчид нь дунд сургуулийн сурагчид байсныг Шиньхуа агентлаг мэдээлсэн байна.
Сүүлийн өдрүүдэд тухайн бүс нутагт их хэмжээний цас орж, цасанд дарагдсан дээврийн даац хэтэрснээс нурсан гэсэн таамаг яригдаж байгаа гэнэ.
Жямуси хотын Юэчэн Спортын Ордонд гарсан энэ ослын шалтгааныг мөрдөн шалгаж эхэлсэн, тухайн байгууламжийг хариуцсан хүнийг саатуулсан тухай орон нутгийн эрх баригчид өчигдөр товч мэдээлсэн байна.
Энэ оны долдугаар сард Хэйлунжян мужид үүнтэй ижил төстэй осол гарч байжээ.
Тухайн үед тус мужийн Чичихар хотын нэг сургуулийн спорт танхимын дээвэр их устай аадар бороо олон өдөр дараалан орсны дараа нурахад 11 хүн дарагдаж амиа алдсан байна.
Дараалсан ослууд барилгын чанарын асуудалд олон нийтийн анхаарлыг хандуулжээ.
Тухайлбал Мягмар гарагт Хятадын Вэйбо сошиал сүлжээнд Жямуси хотод гарсан осол хамгийн том сэдэв болж, 1.3 тэрбум гаруй хандалт дагуулсан байна.
“Чичихарын нуралтын дараа хаа сайгүй чанарын шалгалт эхэлсэн тухай мэдээлж байсан. Шалгалтын үр дүн юу болов? Энэ бол хүний алдаанаас болсон осол” гэж нэр хэрэглэгч бичсэн нь олон мянган хүний дэмжлэгийг авчээ.
Иргэд энэ мэтээр орон нутгийн удирдлагуудаас барилгын чанарын асуудалд анхаарал хандуулахыг шаардаж эхэлсэн байна.
Хятадын хамгийн хүйтэн нутаг гэгддэг Хэйлунжянд сүүлийн өдрүүдэд цаг агаар эрс хүйтэрч, их хэмжээний цас ороод байгаа.
Мужийн зарим хэсэгт сургуулиудыг хааж, агаарын болон төмөр замын тээврийг зогсоосон байна.
Эх сурвалж: BBC
