УИХ дахь АН-ын бүлэг өнөөдөр /2022.05.23/ хуралдаж, хуралдааны үеэр хэлэлцсэн асуудлуудын талаарх мэдээллээ өглөө. Өнөөдрийн хуралдаанаар хоёр асуудлын талаар хэлэлцсэн байна. Үүнд:
- Засгийн газрын өрийн удидлагын 2023-2025 оны стратегийн баримт бичиг бодлогын тухай УИХ-ын тогтоолын төсөл
- Эрүүгийн хэрэг хянан шийдвэрлэх тухай хуульд нэмэлт өөрчлөлт оруулах тухай хуулийн төслийн талаарх мэдээлэл авах тухай мэдээллийг авч хэлэлцсэн байна.
УИХ-ын АН-ын дарга Д.Ганбат дараах мэдээллийг өгсөн юм. Тэрбээр,
"Өнөөдрийн байдлаар нэг иргэнд тооцогдох өр 30-32 сая төгрөг болсон. МАН-ын засаглалын үед өр хоёр дахин нэмэгдсэн байна. Энэ бол гамшгийн байдалд ирснийг илтгэж байна. АН-ын бүлгийн хувьд өрийг ард иргэдийн татварын мөнгөөр төлж болохгүй гэсэн байр суурьтай байна.
Хоёрдугаар асуудлын хувьд, Эрүүгийн хэрэг хянан шийдвэрлэх тухай хуульд нэмэлт өөрчлөлт оруулах тухай хуулийн төслийг өргөн барьсан, үүнд дэмжих боломжгүй болон дэмжих боломжтой хэд хэдэн зүйл заалт байна.
Тухайлбал, Доромжлох, гүтгэх зүйл заалтыг эрүүгийн хуулинд оруулж ирсэн. Эрх мэдэлтэй, албан тушаалтай хүмүүсийн асуудлыг ил тод хэлэх хэрэгтэй. Үүнийг дэмжиж болохгүй. Мөн Эрүүгийн хэрэг хянан шийдвэрлэх тухай хуулийн 12.1.1, 12.3.1 дүгээр зүйл заалтад нэмэлт өөрчлөлт оруулж, "Мөрдөгч эрүүгийн хэргийг хянан шийдвэрлэх ажиллагаанд оролцогчдыг дуудан ирүүлэх болон албадан ирүүлэх" ажиллагааг тусгасан байна. Энэ нь мөрдөгч буюу цагдаа АТГ, тагнуул зэрэг хууль сахиулах байгууллагын албан тушаалтан ийнхүү прокурорт танилцуулахгүйгээр хэн дуртай хүнээ дуудан ирүүлэх, шүүхийн шийдвэргүйгээр албадан ирүүлэх боломжтой болгож байна. Энэ бол 2002 оны үед хэрэгжиж байсан хууль. Энэ бол хүний эрхийг маш их зөрчсөн хууль заалт учир болохгүй.
Мөн өрийн тухай асуудалтай холбогдуулан хэлэхэд, 2010 онд Тажикстан улсын гадаад өрийн хэмжээ ДНБ-ийнхээ 50 хувиас давж, зээлээ төлөхөд хүндрэл үүссэн учраас өрөө төлөхийн тулд газар нутгийнхаа тодорхой хэсгийг БНХАУ-д шилжүүлсэн байдаг. Өрийн хавханд орох дараагийн улс бол Монгол Улс гэдэг нь мэдрэгдэж байна. Магадгүй Өмнөговь аймаг болон тодорхой хэмжээний өргөрөгөөс урагш газруудаа өрөнд алдах ийм нөхцөл байдал үүсч болзошгүй" гэлээ.