Монголын бурхан шашинтны төв Гандантэгчинлэн хийдийн тэргүүн их Хамба номун хан, Соёлын гавьяат зүтгэлтэн, гавж Д.Чойжамц ламын үүрэгт албанаас чөлөөлөгдөх хүсэлтээ энэ сарын 1-ний өдөр өгсөн.
Энэ талаар тэрээр "Монголын бурхны шашны төвийн хамбаар би 31 жил ажилласан. Түүнээс өмнө дөрвөн жил дээд хамба хийсэн. Да лам гэх албанд байсан. Ингээд 36 жил болсон. Энэ нэг их бахархалтай зүйл гэж би бодохгүй байна. 1937 онд туршлага, мэдлэгтэй лам нарыг егүүтгэсэн. 1970 онд шашны дээд сургууль гараад, дөрвөн жилд 10-20 хүн авдаг байсан. 1990 онд ардчилсан хувьсгал гараад, бужигнаан үүссэн. Тухайн үед лам нар цөөрсөн. Тиймээс туршлага, мэдлэгтэй лам нар өндөр насалсан, багачууд нь хэт бага байсан. Дунд нь шашны дээд сургууль төгссөн хэдэн хүн байсан. Тэд дотроос намайг хамбаар тавьсан. Энэ хооронд монголын хэмжээнд ганцхан гандан хийд ажиллаж байсан. Монголын бурхан шашинтны төв Гандантэгчинлэн хийдээ түшиглэн, дэмжлэг үзүүлж, долоон уламжлалт сургуулийг байгуулсан. Тэнд сурч боловсорсон хүмүүс орон нутгийн хийдэд ажилладаг болсон. Бүхэл бүтэн буддын шашны боловсролын тогтолцоо үүссэн гэж хэлж болно. Үүний үндсэн дээр зарим нэгэн зүйл 1937 оноос хойш тасарсан байсан. Энэтхэг улсад 10-аад мянган шавьтай гурван том сургууль бий. Тэнд мухар сүсгээр биш судалгаа шинжилгээ, мэтгэлцээн, логик хэлэлцээний үндсэн дээр бурхны номоо судалж, баталдаг. Энэ бүхэнд 24 жил шаардлагатай. Монголоос 1990 оны эхээр Энэтхэгт суралцахаар явсан хүүхдүүд 3-4 жилийн өмнөөс ирж эхэлсэн.
Эрдэмтэй боловсролтой, лхаарамба цолтой хоёр залуу лам маань сургуулиа төгсөөд ирлээ. Мөн гавж, гэвш цолтой 20 орчим залуус эх орондоо ирлээ. Хувилгаад, хутагт нь бий болж, тодорсон сайхан үед эрдэм, боловсролтой хүмүүс маань шашнаа улам түгээн дэлгэрүүлэх чухал цаг үе ирж байна. Нэг шат өндөрсөж байна. Ийм үед Лхаарамбын дамжааг нэгдүгээр зэрэгтэй хамгаалсан Д.Жавзандорж гэдэг ламыг бурхны шашнаа удирдаж явах чадамж төгөлдөр болжээ гэж үзээд, хүсэлт гаргаж, томилохоор болсон.
Би Гандантэгчинлэн хийдийн уугуул хүн. 1970 онд Азийн буддистуудын энх тайвны бага хурал хуралдаж, би монголын хамгийн анхны лам болсон. Одоо бол гандангийн хамгийн өвгөн лам болсон. Тиймээс хэзээ дуртай цагтаа Гандандаа ирж, ном хурна. Дэлхийн бурхны шашны долоон том байгууллага бий. Үүний гурвынх нь удирдах албанд ажилладаг. Азийн буддистуудын энх тайвны хурлын ерөнхийлөгч, Дэлхийн буддын дээд хэмжээний чуулгын ерөнхийлөгч, энэ жил Япон төвтэй бурхны шашны байгууллагын том хүн болсон. Энэтхэгт бас Олон улсын буддын шашны байгууллага байдаг. Тэр байгууллагад бодлого тодорхойлогч гэдэг ажил хийдэг. Тэр ажлаа үргэлжлүүлнэ. Азийн буддистуудын энх тайвны хурлын ерөнхийлөгчийн сонгууль 2026 онд болно. Тэр хүртэлх хугацаанд шашны ажлаа улам бэхжүүлэх тал дээр ажиллана" гэлээ.
