Дархан-Уул : Олон улсын хөдөлмөрийн байгууллагаас жил бүрийн 04 дүгээр сарын 28-ны өдрийг “Ажлын байран дахь хөдөлмөрийн аюулгүй байдал, эрүүл ахуйн дэлхийн өдөр” болгон тэмдэглэж ирсэн. Энэ дагуу 2022 онд “Аюулгүй байдал, эрүүл мэндийн эерэг соёлыг хамтдаа төлөвшүүлье” уриаг дэвшүүлжээ. Дээрх уриан дор “Хөдөлмөрийн сарын аян”-ы нээлтийг Залуучууд театрын их танхимд даваа гарагт зохион байгууллаа.
Нээлтийн арга хэмжээнд аймгийн Засаг даргын орлогч А.Түвшинбат оролцож 110 гаруй аж ахуйн нэгж байгууллагын удирдлагууд болон хөдөлмөрийн аюулгүй байдал, эрүүл ахуйн ажилтан, албан хаагчдад хандан Үйлдвэрлэлийн осол, мэргэжлээс шалтгаалсан өвчнөөс урьдчилан сэргийлэх, соёл зан үйлийг төлөвшүүлэх, Хөдөлмөрийн тухай хууль, Хөдөлмөрийн аюулгүй байдал, эрүүл ахуйн хууль тогтоомжоор хүлээсэн үүргээ хэрэгжүүлэхийг уриалж амжилт хүслээ. Сарын аяны хүрээнд ААНБ-ууд ажилтны эрүүл, аюулгүй ажлын байранд ажиллах, хүүхэд, залуучуудын аюулгүй орчинд сурах, хүмүүжих нөхцөл боломжоор хангах чиглэлээр урьдчилан сэргийлэх ажил зохион байгуулах аж. Уг чиглэлийн дагуу хийсэн ажлын тайланг 2022 оны 05 дугаар сарын 01-ний дотор Хөдөлмөр, халамж үйлчилгээний газрын Хөдөлмөрийн харилцаа, хөдөлмөрийн аюулгүй байдал хариуцсан мэргэжилтэн Н.Энхжаргалд албан бичгийн хамт ирүүлэх ажээ. Энэхүү аяны хүрээнд мөн Залуучууд театрт хөдөлмөр эрхлэлтийг дэмжих хөтөлбөрүүдийг танилцуулах, ажлын байранд жуулчлах өдөрлөгийн арга хэмжээ боллоо. Өнөөдрийн байдлаар Хөдөлмөр, халамжийн үйлчилгээний газарт 48 байгууллагаас 100 гаруй ажлын байрны захиалга иржээ.
