Дундговь аймгийн хөгжлийн их сангийн тэргүүн С.Буджав 100 жилийн ойгоо тэмдэглэсэн 6 сумын залуу гэр бүлийг өргөө, гэртэй болголоо. С.Буджавын хувьд өмнө нь аймгийнхаа ИТХ-ын даргаар ажиллаж байсан нэгэн бөгөөд Дундговь аймгийн хөгжлийн их сангаараа дамжуулж сайн үйлсийн аяныг тогтмол зохион байгуулдаг нэгэн юм.
Тэрээр, Ковидын хөл хорионы үед Дундговь аймгийнхаа нэгдсэн эмнэлэгт явуулын эхо аппарат бэлэглэж байсан бол Дундговь аймагт баригдаж буй "Ид шидийн орон" төсөлд мөн гар бие оролцож, хандив тусламжаа өгч байжээ.
Дундговь аймгийн Сайнцагаан сумын залуу гэр бүлийн тэргүүн Э.Лхагвабаатар дөнгөж цэргээс ирээд байхдаа төсөлд хамрагдаж, өргөө цагаан гэртээ болжээ. Тэрээр гэргий Ж.Бунъяатайгаа хамт аймагтаа ажиллаж, амьдарч байгаа бөгөөд тусдаа гарч амжаагүй байжээ.
Харин Дундговь аймгийн Сайхан-Овоо сумын бага ангийн багш Б.Баярмаагийнх өнгөрсөн жил галд өртөж орон гэрээ алдсан байжээ. Тиймээс сумын иргэд нь дэмжин тэднийг Дундговь аймгийн хөгжлийн их сангийн гэртэй болгох төсөлд хамруулж, орон гэртээ болгосон юм.
Дундовь аймгийн Дэлгэрцогт сумын залуу гэр бүл Э.Хүрэлхүүгийнх ам бүл зургаа. Өөрөө сумынхаа Төрийн банкинд, гэргий нь сумынхаа ЗДТГ ажилладаг ч мөн л орон гэр шаардлагатай байжээ. 
Дундговь аймгийн Дэлгэрхангай сумын ШТС-ын түгээгч Ч.Энхбатынх мөн төсөлд хамрагдаж, өргөө гэртэй болсон бол Эрдэнэдалай сумын хөдөлмөрч гэр бүл Б.Шинэбаярынх өргөө цагаан гэртэй болов. Б.Шинэбаяр гэргийнхээ хамт малын тэжээл тариалах, хонь ямаа самнах, ногоо тарих гээд маш олон төрлийн ажил хийдэг байна.
Харин Дундговь аймгийн Хулд сумын залуу гэр бүл А.Бат-Очирынх тусдаа гарч амжаагүй байсан бөгөөд төсөлд хамрагдаж, өргөө цагаан гэртэй болов.
