Энэ долоо хоногт АНУ-ын үндэсний сансар судлалын байгууллага NASA нэгэн жижиг боловч сонирхолтой нээлт хийснээ зарлажээ.
Тус байгууллагын дэлхийгээс хөөргөсөн Lucy сансрын хөлөг Dinkinesh нэртэй жижиг астероидод хүрэхдээ энэхүү сансрын биет өөрийн бяцхан дагуултай болохыг анх удаа мэдсэн байна.
Мэргэжилтнүүд уг дагуулыг нь “мини сар” хэмээн өхөөрдөн нэрлэжээ.
Лхагва гарагт Lucy хөлөг дэлхийгээс 480 сая гаруй километрийн алсад буюу Ангарагийн тойрог замын гадна талын астероидын бүслүүрт оршдог Dinkinesh астероидын ойролцоо нисэн өнгөрөхдөө үүнийг нээсэн юм байна.
Lucy хөлөг 434 км зайнаас астероид, түүний дагуул хоёрын гэрэл зургийг буулгаснаа дэлхийд ирүүлжээ.
Dinkinesh астероид 790 хүрэхгүй метрийн өргөнтэй бол түүнийг маш ойр зайд тойрон эргэлддэг дагуул нь 220 метр орчим өргөн хэмжээтэй юм байна.
NASA-гийн мэргэжилтнүүд Lucy хөлгийг Dinkinesh астероид руу илгээсэн нь дараа Бархасбадь гарагийн ойролцоо оршдог илүү том астероидуудыг судлах бэлтгэл сургуулилалт байжээ.
2021 онд хөөргөсөн Lucy хөлөг 2027 онд Трояан нэртэй эдгээр бүлэг астероидын дэргэд хүрч, тэдгээрийг зургаан жилийн турш судлах юм. Анх тэдгээр астероидуудын тоог долоо гэж үзэж байсан бол явцын дунд шинээр илэрсээр одоо 11 болжээ.
Dinkinesh бол Этиоп улсын үндэстэн угсаатнуудын ярьдаг олон хэлнүүдийн нэг болох амхар хэлээр “чи бол гайхалтай” гэсэн утгатай үг юм байна.
“Dinkinesh нэрдээ зохисон гайхалтай сонин сансрын биет юм” гэж NASA-гийн судлаачдын нэг Хал Левисон ярьжээ.
