УИХ-ын чуулганы өнөөдрийн /2023.11.02/ хуралдаанаар Монгол Улсын 2024 оны төсвийн тухай, Нийгмийн даатгалын сангийн 2024 оны төсвийн тухай, Эрүүл мэндийн даатгалын сангийн 2024 оны төсвийн тухай хуулийн төслүүдтэй хамт өргөн мэдүүлсэн хууль, тогтоолын төслүүдийг хэлэлцэж байгаатай холбоотойгоор УИХ-ын гишүүдийн асуултад холбогдох албаныхан хариулт өгч байна.
Газар зохион байгуулалт, геодези зураг зүйн газрын дарга А.Энхманлай:
2022 онд Засгийн газраас төрийн өмчийн болон орон нутгийн өмчийн байгууллагуудын газрын бүртгэлийг хийж судалгаа гаргасан байдаг. Энэ судалгаагаар нийтдээ 19325 нэгж талбар дээр төрийн болон орон нутгийн өмчийн байгууллагууд 80 мянган га газрыг эзэмшиж байна гэж гарсан. Энэ судалгаандаа үндэслээд нийслэлийн хэмжээнд сургууль цэцэрлэгийн болон эмнэлгийн газрууд дээр шалгалт хийсэн байдаг. Нийслэлд 166 ерөнхий боловсролын сургууль, 283 цэцэрлэг, 49 эрүүл мэндийн байгууллага газар ашиглаж байна. Үүнээс 22 ЕБС, 6 цэцэрлэг, 9 эмнэлгийн газрын хэмжээ өөрчлөгдсөн гэж гарсан. Төсвийн байнгын хорооны хурал дээр Ш.Раднаасэд гишүүнээс төрийн өмчийн газраас хувийн хэвшилд олгогдож, орон сууц баригдсан, баригдаж байгаа газрыг буцааж төрийн өмчид шилжүүлэх үүргийг ГЗБГЗЗГ-ийн бүрэн эрхэд оруулж өгөөч гэсэн санал гаргасан. Энд бол хүний өмч хөрөнгө байгаа. Шийдвэр гаргасан этгээд нь орон нутгийн удирдлагууд Засаг дарга нар. Тиймээс шийдвэрээ хүчингүй болгоод хуульд нийцүүлээд мөн шүүхийн маргаан үүсвэл шийдэгдсэний дараа газар бол төрийн өмчид шилжих бүрэн бололцоотой учраас энэ асуудлыг дэмжээгүй гэсэн.
