“Эрдэнэс Тавантолгой” компанийн онцгой дэглэмийн хугацаа дуусгавар болж, гүйцэтгэх захирлаар Х.Мөнхжаргалыг түр хугацаагаар томилсон байгаа. Гэхдээ удахгүй дахин БЭТ томилж, Ж.Ганбатыг үргэлжлүүлэн томилж магадгүй гэсэн мэдээлэл байна. Тус компанийн БЭТ-ийн хугацаа дуусч, Ж.Ганбат Сангийн яамны ТНБД-аар буцаан томилсон байгаа юм.
Өчигдрийн Засгийн газрын хуралдаанаар ЗГХЭГ-ын дарга Д.Амарбаясгалан "Засгийн газрын хуралдаанаар "Эрдэнэс Тавантолгой" компанид томилогдон ажилласан Бүрэн эрхт төлөөлөгчийн ажлын тайланг сонслоо. Хийсэн ажлыг нь өндрөөр үнэлж, ач холбогдлыг нь улам баталгаажуулж, олон улсын жишигт нийцсэн удирдлага, гүйцэтгэх засаглалын бүтцийг нь шинэ түвшинд гаргах шаардлагатай байна гэж үзэн хуулийн дагуу арваннэгдүгээр сарын 26-нд БЭТ-ийг дахин томилж ажиллуулах нь зөв гэж шийдвэрлэсэн. Тэр хүртэлх хугацаанд БЭТ-ийн санал болгосны дагуу "Эрдэнэс Тавантолгой" ХК-ийн Дотоод хяналт шалгалт, аудитын газрын даргыг түр орлон гүйцэтгэгчээр ажиллуулах, ТУЗ-ийн шийдвэрийг өнөөдөр сонслоо. Засгийн газрын хуралдаанаар БЭТ-ийг дахин томилно гэсэн юм"
Тэгвэл Ж.Ганбатыг эргүүлж томилохоор нам нь дотроо тохироо хийсэн байх магадлалтай. Харин энэ талаар яамны ТНБД Ж.Ганбатаас тодруулахад "Өчигдөр Засгийн газрын хуралдаанд тайлангаа танилцуулсан. Намайг дахин томилох тухай яригдаагүй. Надад бол ямар нэгэн зүйл хэлээгүй" гэсэн тайлбарыг өглөө.
Дашрамд дуулгахад Засгийн газраас онцгой дэглэмийг дахин сунгахгүй, шууд удирдлага томилохоор болжээ.
