Гандантэгчэнлин хийдийн их хамбаар томилогдсон лхаарамба Дуламрагчаагийн Жавзандорж нь 1980 онд Сүхбаатар аймгийн Баруун-Уртад төржээ. Сүхбаатар аймгийн Эрдэнэмандал хийд 1991 онд ахин сэргэн үйл ажиллагаа явуулж эхлэхэд 7 хүүхэд шавилан суусны нэг нь болж, 11 насандаа анхлан бурхны номд суралцсан байна. Тэрээр айлын 4 хүүхдийн ганц хүү нь.Улаанбаатар хотод ирээд Зүүн хүрээ Дашчойлон хийд, Гандантэгчэнлин хийдийн Дашчоймпил дацанд буддын гүн ухаанд үргэлжлүүлэн суралцаж байгаад 1998 онд Энэтхэгт суралцахаар явжээ.
Ингээд Энэтхэгийн Брайбүн хийдийн Гоман дацанд ном үзэн 2018 онд лхаарамба цол хамгаалсан юм. Лхаарамба бол бурхны шашны гүн ухааныг судалсан хүнд олгодог хоёрдугаар зэргийн цол.
Буддын гүн ухааны таван ботийг 16 жилийн хөтөлбөртэйгээр дүүргэсний эцэст лхаарамбын шалгалт өгөх эрх авдаг. Эрхээ аваад зургаан жилийн турш шалгалт өгдөг байна. Д.Жавзандорж нь энэ шалгалтад дөрвөн жил тэргүүлж, хоёр жил дэд байрт шалгарч лхаарамба цол авчээ. Мөн 2003 оноос 2017 онд Энэтхэгийн Гоман дацандаа багшилж байсан аж.
Д.Жавзандоржийг ардын хувьсгалаас хойш лхаарамба цол авсан анхны лам хэмээн онцолдог. “Монгол багш” хэмээн өргөмжилдөг лхаарамба Д.Жавзандорж нь Далай багшийн 80 насны ойгоор олон ном цээжилсэн хоёр хүний нэгээр тодорсон гээд түүний тухай олон баримт бий. 2023 оны гуравдугаар сард Энэтхэгийн Гомон дацангийнхаа нууц тарнийн шалгалтыг амжилттай өгч, төгсөглийн зэргийн шалгалтдаа тэргүүлсэн гэдэг мэдээлэл бий.
2018 онд лхаарамба цолоо аваад 2019 оноос Монголдоо шашин номын хэрэг, сүсэгтэн олон, цаашлаад нийгмийн сайн сайхны төлөө хөдөлмөрлөхөөр сэтгэл шулуудан Гандантэгчэнлэн хийдэд сууж, Монголын Шашны дээд сургуульд багшлах болжээ.
Тэрээр бурхан гэж юу вэ гэсэн асуултад “Бурхан гэдэг нь гэм бүгдээс ангжирч эрдмийг төгсгөн гэгээрснийг хэлнэ” хэмээн хариулсан байдаг.