Засгийн газрын хуралдаанаар өнөөдрийн /2023.11.01/ хөдөлмөр халамж үйлчилгээний салбарт процессын дахин инженерчлэл хийж байгаа талаар хэлэлцжээ.
Энэ талаар ЗГХЭГ-ын дэд дарга Б.Баасандорж мэдээлэл өглөө. Тэрээр "Иргэн төрийн байгууллагад ирэхэд нэгээс илүү төрийн албан хаагчийг дамжихгүйгээр хүссэн үйлчилгээгээ авах ёстой гэж үзэж процессын инженерчлэлийг хийсэн.
Процессын дахин инженерчлэлийг хийхдээ хэд хэдэн зарчим баримталсан.
Нэгдүгээрт, иргэн, төрийн албан хаагч хоёр харилцан сэтгэл ханамжтай байх ёстой.
Хоёрдугаарт, ил тод байя
Гуравдугаарт, түргэн шуурхай байя
Дөрөвдүгээрт, амар хялбар байя
Энэ бодит байдлыг бий болгох үүднээс хөдөлмөр нийгмийн хамгааллын салбарт нийт 211 үйлчилгээнд процессын дахин инженерчлэл хийлээ. Үүнд 1999 бодит эрсдэл байна. Тодорхой баримттай судалгааны үндсэн дээр эдгээр эрсдэлийг гаргаж ирсэн. 211 үйлчилгээнд 1999 эрсдэл байна гэдэг нь хүнд сурталтай, олон шат дамжлага дамжиж иргэд бухимдаж байна гэсэн үг.
Нийслэлийн 9 дүүрэгт иргэн үйлчилгээ авахад 23-34 мянган төгрөг зардал гаргаж байна. Орон нутагт 54-108 мянган төгрөгийн зардал гаргаж байж иргэн үйлчилгээ авч байна. Орон нутагт зардал өндөр байгаа нь харьяалал харгалзаж үйлчилгээ үзүүлж байгаагаас шалтгаалж байна. Үүнийг бид халж, харьяалал харгалзахгүй үйлчилнэ. Иргэн хүссэн аль ч цэг дээрээс нийгмийн даатгалын, нийгмийн халамжийн үйлчилгээ авах боломжийг бүрдүүлнэ.
Халамжийн 46 үйлчилгээний 22-ыг нь бид эргэж харах ёстой юм байна. Жишээлбэл, алдарт эхийн одон, ахмад настны хишиг нь халамж биш төрийн дэмжлэг юм.
Цахимжилт сүүлийн жилүүдэд эрчимтэй явагдаж байгаа. Гэтэл Нийгмийн даатгал болон ХНХ-ын салбарт иргэдээс цаасан материал шаардсаар л байна. Нийгмийн даатгалын байгууллагын 96 үйлчилгээний 70 хувь, халамжийн 72 үйлчилгээний 68 хувь нь иргэдээс цаасан баримт, материал шаардсаар байна.
Жишээ нь, тэтгэвэр тогтоох болон тэтгэмж авах үйлчилгээнд иргэн өргөдөл, цээж зураг, оршин суугаа газрын тодорхойлолт гэх мэт халчихсан байх ёстой баримтыг иргэдээс шаардаж байна. Тэгэхээр процессын дахин инженерчлэлийн хүрээнд иргэд 53 төрлийн үйлчилгээ авахдаа иргэний үнэмлэхтэйгээ ирэхэд л болно.
Эмнэлэг магадлалын комиссын хурал иргэдийг маш их бухимдуулж байна. Хоёр удаагийн хурлыг нэг удаа болгож байгаа. Иргэн хоёрхон минутын хуралд оролцохын тулд 1180 км зам туулан 2 хүртэлх сая төгрөгийн зардал гаргаж, 14 хоног зарчуулж байж хуралд оролцдог гэсэн судалгаа байна.
Тухайн иргэн эмчийн үзлэгт орсон бол дахин эмнэлэг магадлалын комиссын хуралд өөрийн биеэр ирж суух шаардлагагүй болж байгаа юм" гэлээ.
