Уул уурхай, хүнд үйлдвэрийн сайд Ж.Ганбаатар шатахууны хомсдол, ОХУ-ын тээвэрлэлттэй холбоотой асуудлаар мэдээлэл өглөө.
Тэрбээр, "ШТС-уудаас шатахуун олдохгүй байгаа гэх асуудлын тухайд, ОХУ-ын Засгийн газрын тогтоол гарахад Монгол Улсад бараг 20 хоног ачилт хийгдээгүй. Шок үүссэн. Ганцхан Монгол Улс л хоригт орчихоогүй шүү дээ. Бүх л улсад асуудал үүссэн. Энэ доголдлоос бага багаар гарч байна.
Хориг тавигдсан өдрөөс хойш өнөөдрийг хүртэл 36 мянган тонн AИ92 импортолж оруулж ирсэн. Манай нийт хэрэглээ хамгийн ихдээ 53 мянган тонн байдаг. Байнга ачигдаж, байнга ирж байгаа. АИ92 шатахууны хувьд бол зохистой хэмжээнд байна. Ойрын үед жигдэрчихнэ гэдэгт 100 хувийн амлалт өгье. Ганц хоёр шатахуун түгээх станцад доголдол үүсээд байгаа учраас бусад ШТС-даа нөлөөлөөд байгаа юм. Нийлүүлэлтэд ямар ч асуудал байхгүй. Энэ удаагийн үүссэн асуудал нөөцөөс болоогүй.
Дизель түлшийн хувьд 44 мянган тонн орж ирсэн. Дизель түлш 10 дугаар сард асуудалтай байдаг. Яагаад гэхээр зуны түлшээс өвлийн түлш рүү шилждэг процесст асуудал гардаг. Нөөцөлж болдоггүй. Дараа жилээс 30 хоног биш 45 хоног нөөцөлчихдөг, төр өөрөө нөөцлөх савтай болох асуудлыг хурдавчлах шаардлагатай байна. Үнийн хувьд ШТС-ууд 200 төгрөг нэмсэн асуудал байна. Үүнийг бид хянах боломжгүй. Биржийн үнэ 9 сараас хойш буусан байгаа нь үнэ буурна гэсэн үг. Зах зээлийнхээ үнийг барьж явна" гэлээ.