Нийслэлийн нутаг дэвсгэрт үйл ажиллагаа явуулж буй нийтийн байрны орчин, нөхцөл байдалд хяналт шалгалт хийж эхэллээ. Тодруулбал, нийслэлийн ажлын хэсгийн бүрэлдэхүүн өнөөдөр Баянзүрх дүүргийн 31 дүгээр хороонд байрлах нийтийн байрнуудын нөхцөл байдалтай танилцжээ.
Тус ажлын хүрээнд нийтийн байрны эрүүл ахуй, гал болон цахилгааны аюулгүй байдал зэрэг нь шаардлага хангаж буй эсэхийг шалгаж, шалгалтаар илэрсэн зөрчил дутагдлыг арилгуулан, цаашид авч хэрэгжүүлэх арга хэмжээний санал, дүгнэлтийг боловсруулах юм. Нийслэлийн хэмжээнд нийтийн 705 байр байдгаас 665 нь хувь хүнд, үлдсэн нь аж ахуйн нэгжид бүртгэлтэй байна.
Нийслэлийн Засаг даргын орлогч О.Номинчимэг "НИТХ-аас 2019 онд Нийслэлийн нутаг дэвсгэрт нийтийн байрны үйлчилгээ эрхлэхэд дагаж мөрдөх журмыг баталсан боловч зохих түвшинд хэрэгжээгүй, хууль эрх зүйн зохицуулалт дутмаг байна. Судалгаанаас үзэхэд нэг байранд дунджаар 10-50 хүн амьдарч байгаа. Эдгээр иргэний бүртгэл, хүүхэд хамгаалал алдагдаж, таатай орчин нөхцөлд амьдрах эрх зөрчигдөж байна. Иймд дүүрэг бүрээс байгуулсан дэд Ажлын хэсгүүд хяналт шалгалтын дүгнэлтээ арваннэгдүгээр сарын 20-н гэхэд ирүүлж, уг дүгнэлтэд үндэслэн нийслэлийн хэмжээнд нийтийн байрны үйлчилгээ эрхлэх шаардлага, стандарт болон зохицуулалтын талаар зөвлөмж гаргана" гэлээ.
