Орон нутгийн цагаар лхагва гарагийн орой АНУ-ын Мэн мужийн Льюистон хотод галт зэвсэгтэй этгээд удаа дараалан халдлага үйлдсэн байна. Одоо мэдэгдэж байгаагаар гэмт этгээд хоёр байршилд гал нээж 22 хүний амийг хороож, 60 орчим иргэнийг гэмтэж шархдуулжээ.
Гэмт этгээд байж болзошгүй буугаар зэвсэглэсэн этгээдийн зургийг олон нийтэд дэлгэн харуулсан байна. Сэжигтэн халдлага үйлдсэнийхээ дараа хэргийн газраас зугтсан. Түүнийг эрэн сурвалжилж, баривчлах ажиллагааг хотын цагдаа нар явуулж байна.
Льюистон хотын цагдаа нар сэжигтний зургаар мэдээллийг нь олсон байна. Уг халдлагад сэжиглэгдэж, эрэн сурвалжлагдаж байгаа этгээд нь 1983 оны дөрөвдүгээр сарын 4-ний өдөр төрсөн 40 настай Роберт Кард гэгч болохыг тогтоолоо. Тэрээр хүнд зэвсэглэсэн, онц аюултай этгээд болохыг хотын цагдаагийн газар албан ёсны FB хуудсандаа нийтэлжээ.
АНУ-ын Холбооны мөрдөх товчоо, Хуульзүйн яам, Дотоодын аюулгүй байдлыг хамгаалах газар зэрэг хууль хүчний томоохон байгууллагууд гэмт этгээдийг баривчлах ажиллагаанд Льюистон хотын цагдаа нарт туслахад бэлэн гэдгээ илэрхийллээ. Америкийн Ерөнхийлөгч Жо Байден Цагаан ордонд мэдэгдэл хийж, нөхцөл байдлыг ойроос хянан ажиглаж байна гэжээ. Мөн Байден Мэн мужийн захирагч Жэнет Миллс болон тус мужаас сонгогдсон хууль тогтоогчид, эрх баригчидтай тусгайлан утсаар ярьсан байна.
Эх сурвалжуудын мэдээлснээр гэмт этгээд Льюистон хотын Шеменгийс зоогийн газар болон Sparetime Recreation боулингийн талбайд гал нээсэн байна. Халдлага болсон хот нь Мэн мужийн хоёр дахь том хот бөгөөд Ореган мужийн Портланд хотоос 60 орчим км-ын зайтай байрладаг. Мэн мужийн цагдаагийн газраас халдлага гарсан хот болон ойролцоох суурин газруудад ард иргэдийг аль болох гэрээсээ гарахгүй байж хаалга үүдээ сайтар түгжих, түр хорогдох байранд шилжих зэргээр аюулгүй байдлаа өндөржүүлэн хамгаалахыг анхаарууллаа.
Учир нь гэмт этгээд одоо хүртэл баригдаагүй сул чөлөөтэй байгаа тул дахин халдлага үйлдэж, иргэдийн амь насыг хороох эрсдэлтэй байгаа юм. Мөн сэжигтний зургийг олон нийтэд тарааж, гэмт хэргийн мөрдлөгт тус болох мэдээ мэдээллийг цагдаагийн газарт өгөхийг оршин суугчдаас хүссэн байна.
