Аравдугаар сарын 7-ноос хойш 14 хоногийн хугацаанд Хамас бүлэглэлийн барьцаанд байсан хоёр эмэгтэй суллагдсан талаар Израилын эрх баригчид мэдээллээ. "Өнөөдөр (Даваа гарагт) 79 настай Нурит Купер болон 85 настай Йохавед Лифшиц нар Хамас террорист байгууллагын "гар"-аас суллагдлаа" гэж Израилийн Ерөнхий сайд Беньямин Нетаньяхугийн албанаас гаргасан мэдэгдэлд дурджээ.
Хамас бүлэглэл энэ сарын 7-нд еврейчүүдийн Симчат Тора хэмээх үндэсний томоохон баярын үеэр Израилын өмнөд, хойд хилийн долоон чиглэлээр нэвтэрч, агаарын болон хуурай замын өндөр зохион байгуулалттай дайралт хийсэн. Хамас бүлэглэлийн удирдагчид "Аль-Акса шуурга" хэмээн нэрлэж буй цэргийн ажиллагааны үеэр тэд Израилын 200 гаруй иргэнийг барьцаалсан юм.
Барьцаалагдсан Израилын иргэдийг суллах асуудлаар Хамастай хэлэлцээр хийхэд Катарын тал зуучлагчийн үүрэг гүйцэтгэж буй. Учир нь Хамас бүлэглэлийн улс төрийн жигүүрийн удирдагчид Катарт амьдардаг бөгөөд энэ нь Катарын эрх баригчид тэдэнтэй шууд хэлэлцээр хийх боломжийг олгож байгаа юм.
Эргэн сануулахад Хамас бүлэглэлийн барьцаалсан 200 гаруй иргэнийг суллах хүртэл Газын зурвас руу хүмүүнлэгийн тусламж оруулахгүй гэдгээ Израил мэдэгдээд байгаа. Энэ сарын 7-ны өдрөөс хойш анх удаа Египетийн хилээр дамжуулан Газын зурвас руу хүмүүнлэгийн тусламж ачсан 20 машиныг нэвтрүүлсэн. Газын зурваст хоол хүнс, цэвэр ус, эрчим хүчний нөөц бараг хомсдож байгааг олон улсын байгууллагын төлөөлөгчид мэдээлж буй юм.
