Ухаалаг гар утсаараа хичнээн төрлийн үйлчилгээг хэрхэн авч болохоос эхлээд тоон гарын үсгийн хэрэглээ, ач холбогдол, цахим боловсролын талаар иргэд, олон нийтэд нэгэн зэрэг нээлттэй танилцуулсан “Дижитал Баянхонгор” өдөрлөгт оролцлоо.
Цахим жишиг аймаг болох зорилттой #Баянхонгор аймгийн маань төрийн болон орон нутгийн өмчит байгууллагууд, банк санхүү, үүрэн холбооны операторууд зэрэг нийт 46 байгууллага өдөрлөгийн үеэр иргэдэд мэдээлэл, заавар өгч, шуурхай үйлчилж ажиллаа.
Цахим хөгжил, харилцаа холбооны яам өнгөрсөн өдрүүдэд Баянхонгор аймагт ажиллаж, аймгийн хэмжээнд нийт 84 үйлчилгээг E-Mongolia системээр иргэдэд хүргэхээр байршуулжээ. Өдөрлөгийн үеэр Цахим үндэстэн болох зорилтын хүрээнд хэрэглээнд нэвтрүүлсэн D-Parliament аппликейшний талаар танилцуулж, хууль тогтоох үйл хэрэгт эрхийнхээ дагуу оролцоогоо хангахыг уриалав.
Мэдээллийн технологийн дэвшил бүхий л салбарт хөгжлийн хурдасгуур болсон тул Монгол орны хаанаас ч иргэн танд зориулсан бүх төрлийн боломж, үйлчилгээг ухаалгаар ашигладаг болоход цахим боловсролыг түгээх, эзэмших нь хамгийн чухал юм.
