Сэлэнгэ аймагт аравдугаар сарын 22-ны өдөр ойн түймэр гарч, 15 га талбай шатаад байгаа талаар Онцгой байдлын ерөнхий газраас мэдээллээ.
Тодруулбал, Сэлэнгэ аймгийн Ерөө сумын Буургачин багт “Цагаан тохойн мухрын-Ам” гэдэг газар ойн гал түймэр гарсан тухай дуудлагыг аравдугаар сарын 22-ны өдрийн 13:20 цагт ОБЕГ-т ирсэн байна. Дуудлагын дагуу тус аймгийн Онцгой байдлын газрын Мандал сум дахь Онцгой байдлын хэлтсийн Гал түймэр унтраах, аврах 19 дүгээр ангийн алба хаагчид Сэлэнгэ аймагт үйл ажиллагаа явуулдаг аж ахуйн нэгж, байгууллагын ажилтан, албан хаагчидтай хамтран түймрийн баруун, баруун урд, зүүн хойд талыг унтраажээ.
Харин хойд талаараа хад асга ихтэй газарт түймрийг бүрэн унтраахаар ажиллаж байгаа аж. Энэ түймэрт урьдчилсан байдлаар 15 га орчим талбай шатжээ.
