ДЭМБ-аас сармагчны цэцэг өвчний 80 тохиолдол 11 улсад бүртгэгдээд байгааг мэдээлэв.
"Одоогийн байдлаар 80 орчим тохиолдол нотлогдоод байгаа бөгөөд 50-д нь шалган тодруулах ажиллагаа явуулж байна. Тандалт өргөжихийн хэрээр илүү олон тохиолдол бүртгэгдэх хандлагатай байна" гэж мэдэгдэлд дурджээ.
Тус байгууллага энэ өвчин зарим улс орны ан амьтны популяцид тархаж байгаа нь орон нутгийн хүн ам, аялагчдын дунд үе үе дэгдэлт гарахад хүргэдэг гэж тэмдэглэв. Үүний зэрэгцээ, өнөөгийн энэ дэгдэлт эндемик бус буюу халдварын голомтгүй 11 улс оронд бүртгэгдсэн нь ердийн бус нөхцөл байдал болж байна.
ДЭМБ, нөлөөлөлд өртсөн улс орнууд болон холбогдох байгууллагуудтай хамтран уг өвчний тандалт, тэр дундаа эмчилгээний зөвлөмж өгөх зэрэг ажлыг өргөжүүлж байна.
Сармагчны цэцэг өвчин нь COVID-19-ээс өөрөөр тархдаг гэж тус байгууллага тэмдэглэв.
"ДЭМБ хүмүүсийг хэрэв тухайн орон нутагт дэгдэлт хэрэв байгаа бол шинж тэмдэг, урьдчилан сэргийлэх арга хэмжээний талаар үндэсний эрүүл мэндийн байгууллагууд гэх мэт найдвартай эх сурвалжаас мэдээлэл авахыг уриалж байна" гэв.
Сармагчны цэцэг өвчин нь хүнд халдварладаг ховор тохиолддог вирусийн халдвар юм. Энэ нь ихэвчлэн хөнгөн хэлбэрийн эмгэг бөгөөд ихэнх хүмүүс хэдэн долоо хоногийн дотор эдгэрдэг ч зарим хүмүүст хүндрэл гардаг.
Сармагчны цэцэг өвчнийг бэлгийн замын халдварт өвчинд тооцдоггүй ч өвчтэй хүнтэй ойр дотно харьцах замаар халдварладаг гэдгийг мэргэжилтнүүд онцолж байна.
Өвчний эхний шинж тэмдгүүд нь халуурах, толгой өвдөх, булчин өвдөх, нурууны өвдөлт, тунгалагийн зангилаа хавдсан, жихүүдэс хүрэх, ядрах зэрэг шинж тэмдгүүд юм. Тууралт ихэвчлэн нүүрэн дээр эхэлж, дараа нь биеийн бусад хэсэгт тархдаг.
Эх сурвалж: Риа новости