УИХ-ын чуулганы өнөөдрийн нэгдсэн хуралдаанаар Монгол Улсын нэгдсэн төсвийн 2024 оны төсвийн хүрээний мэдэгдэл, 2025-2026 оны төсвийн төсөөллийн тухай хуульд өөрчлөлт оруулах тухай хуулийн төслийг хэлэлцэх эсэхийг хэлэлцэж байна.
УИХ-ын гишүүн Д.Тогтохсүрэн:
Бид жил бүр л энэ 9 тоог хөдөлгөдөг болчихлоо. Уг нь дагаж мөрдөх ёстой.2022 онд инфляц 15-16 хувьд хүрч байсан. Иргэдийн гар дээрх мөнгөний ханш тэр хэмжээгээр буурсан. Инфляцыг нэг оронтой тоонд барих хамгийн чухал. Инфляцыг хөдөлгөдөг цөөн хэдэн хүчин зүйлийн талаар Засгийн газраас мэдээлэл авмаар байна.Нэгдүгээрт, нефтийн асуудал. Жилийн эцэс гэхэд бид инфляцыг нэг оронтой тоонд орно гэж тооцоолсон ч өвлийн түлш 800-900 төгрөгөөр нэмэгдчихлээ.Инфляцад нөлөөлдөг гол зүйл бол нефтийн бүтээгдэхүүн болчихоод байна. Тэгэхээр бидэнд нефтийн өөр эх үүсвэр олох боломж байна уу. Хоёрт, зэсийн үйлдвэрлэлийн хэмжээ нэмэгдсэн үү. Зэс хайлуулах үйлдвэрийн асуудал байнга яригддаг. Гэвч яг өнөөдөр бэлэн болсон төсөл байна уу?
УУХҮ-ийн сайд Ж.Ганбаатар:
Дизель түлшний үнэ нэгдүгээрт 200 төгрөгөөр өссөн. Сая ОХУ-ын Засгийн газрын тогтоолоос шалтгаалаад хомсдсон. 10 дугаар сараас бууна. Шатахууны нефтийн бүтээгдэхүүний үнэ дэлхийн зах зээл дээр бууж байгаа учраас хамаагүй нөөцөлж болохгүй шүү гэдгийг хэлье. Хоёр дахь эх үүсвэрийн хувьд БНХАУ-аас аваад 4 сар болж байна. АИ92, дизель авч байна. Яагаад ОХУ-тай өрсөлдөхүйц хэмжээнд авч чадахгүй байна вэ гэхээр нэгдүгээрт, үнэ өндөртэй. Бас тээвэрлэлтийн асуудалтай. Дамжиж ачдаг. Гэхдээ Оюутолгой болон бусад том уурхайнууд Евро5 ангиллын дизель түлшээ урдаас авч байгаа. Сая Ерөнхий сайд БНХАУ-д айлчлахдаа тус улсын төрийн өмчит компанитай ярилцаж тохирсон. Зэс хайлуулах үйлдвэрийн хувьд хоёр гурван байршил яригдаж байна. Эрдэнэт үйлдвэрийн хувьд 560 мянган тонн зэсийн баяжмал экспортлодог хэмжээндээ тохирсон цэвэр зэс хайлуулах үйлдвэр барихаар төлөвлөсөн.
