УИХ-ын чуулганы нэгдсэн хуралдаанаар Эрүүгийн тухай хуульд нэмэлт, өөрчлөлт оруулах тухай хуулийн төслийн үзэл баримтлалыг хэлэлцлээ. Уг хуулийн төслийг өнгөрсөн долоо хоногт Засгийн газраас яаралтай горимоор хэлэлцэхээр УИХ-д өргөн мэдүүлсэн юм. Хуулийн төслийн онцлох заалтуудаас дурдвал, авлига, албан тушаалын гэмт хэрэгтэн, хүн хөнөөх гэмт хэргийн хүндрүүлэх бүрэлдэхүүнээр хорих ял эдэлж байгаа хүнийг хугацаанаас нь өмнө суллахгүй байхаар заажээ.
Мөн хуулийн төсөлд бага насны хүүхдийн амийг хөнөөх, хүчиндэх гэмт хэрэгт оногдуулах ялын дээд хэмжээг 25 жил болгохоор тусгасан байна. Улмаар Мөн энэ төрлийн гэмт хэргийн хөөн хэлэлцэх хугацаа тооцохгүй байх өөрчлөлтийг төсөлд тусгажээ.
Үүнээс гадна согтуугаар тээврийн хэрэгсэл жолоодсон зөрчлийг гэмт хэрэгт тооцохоор тусгасан байна.
Хуралдааны үеэр УИХ-ын гишүүд хуулийн төслийг дэмжиж байгаа ч согтуугаар тээврийн хэрэгсэл жолоодсон зөрчлийг нарийвчлан тодруулах шаардлагатайг онцолж байлаа. Уг хуулийн төслийг хэлэлцэхийг хуралдаанд оролцсон гишүүдийн олонх нь дэмжив.
