Дорноговь аймгийн Сайншанд суманд хичээлдээ явахаар гараад ор сураггүй алга болсон 12 настай охин харамсалтайгаар амь насаа алдсан хэрэг гараад буй. Тус аймгийн хэмжээнд хяналтын камерын хүрэлцээ байхгүй, түүнээс болж 12 настай сурагчийг эрэн хайх ажиллагаанд хүндрэл учирсан нь улс орон даяар бидэнд бодитой жишээ болсон.
Гэтэл “Хяналтын камергүй“ Дорноговь аймагт "Хун шувуу" хөшөө нээлтээ хийж, олны шүүмжлэлийг дагуулаад буй.
Тодруулбал, Дорноговь аймгаас сонгогдсон УИХ-ын гишүүн, Түгжрэлийн сайд Б.Дэлгэрсайхан, УИХ-ын гишүүн, Үйлдвэржилтийн бодлогын байнгын хорооны дарга Т.Энхтүвшин хөшөөний нээлт хийж байгаа нь олны анхаарлыг татаж байна.
Энэ талаар тус аймгийн Мэдээллийн төвийн ажилтнаас тодруулахад, "220 жилийн ойн хүрээнд "Хун шувуу" хөшөөний нээлт болсон. Санхүүжилт нь хаанаас гарсныг би мэдэхгүй. Хэнээс асууж тодруулахыг ч би мэдэхгүй" гэсэн хариу тайлбар өглөө.
Ингээд төсвийн хэдэн төгрөгөөр ийм хөшөө босгосныг хэлтсийн дарга нараас асуусан боловч хариулт өгөх хүн олдсонгүй.
Дорноговь аймагт байдаг хөшөө дурсгал хиймэл шүтээн, элдэв дүрс суварга, морь малд зориулж босгосон баримлуудын зах зухаас ийм байна. Энэ их хөрөнгийг хэрвээ хяналтын камер суурилуулахад зарцуулсан бол...
Хөшөө гэж юу вэ. Энэ нь улс орны соёлын ололтын нэгээхэн хэсэг байх ёстой аж. Ямар нэгэн чухал зүйл, үйл явдал, хүнийг мөнхжүүлэх зорилгоор байгуулсан баримал, эсвэл архитектурын бүтээн байгуулалт байдаг. Хүний цээж, мөр, эсвэл толгойг дүрсэлж болно. Ямар ч агуулгатай байсан, хэмжээ томтой байх тусам уран сайхны шийдэл сайтай, урлагийн бүтээл байх ёстой. Түүнээс биш дүр төрхийг зүглүүлээд, бүдүүн бааргаар босгож, түүнийг нь олон түмэн зүхэж байдаг эд биш аж.
Манай улсад одоогоор хөшөө барьж байгуулах бодлого болон тавигдах урлаг, уран сайхны шаардлага, стандарт ч гэж алга. Тэгэхээр хөшөө барих улайрал нь цаг үеийн ийм цоорхойг ашиглаж төсвийн болоод хандив, тусламжийн хөрөнгө нааш, цааш гүйлгэх хэрэгсэл төдий байх шив дээ.
