
БНСУ дахь Монгол Улсын ЭСЯ-ны ажилтан согтууруулах ундаа хэрэглэсэн үедээ жолоо барьж яваад цагдаа нарт баригдсан талаар бид өмнө нь мэдээлсэн билээ. Цагдаагийн алба хаагч түүнийг зогсоон, үлээлгэн шалгах гэсэн ч А нь дипломат халдашгүй эрхтэй хэмээн үлээхээс татгалзсан юм.
Уг явдал гарснаас хэд хоногийн дараа Өмнөд Солонгосын Парламентын гишүүн, сөрөг хүчний намын Пак Хон Гын дипломат эрхээ урвуулан ашиглаж байгаа тал дээр арга хэмжээ авч, хуулиа чангатгахыг уриалжээ.
Түүний хэлснээр Солонгост ажиллаж байсан дипломатч нар, тэдний гэр бүлийн гишүүд сүүлийн 5 жилийн дотор согтуугаар жолоо барьсан, хулгай хийсэн 70 орчим хэрэг бүртгэгдсэн байна.
Тэдгээр хэрэг үйлдсэн хүмүүсийн 98.5 хувь нь дипломат халдашгүй эрх эдэлж, эрүүгийн ял шийтгэлээс мултарсан аж. Ийм учир Пак “Гадаадын дипломатч эсвэл түүний гэр бүлийн хүн гэмт хэрэг үйлдсэн нь илт байвал эсвэл халдашгүй эрхээ хувийн шалтгаантай ашиглаж байгаа бол гадаад хэргийн яам халдашгүй эрхээсээ татгалзахыг шаардах хэрэгтэй” хэмээн хуулиа чангатгахыг уриалсан юм.