Сармагчны цэцэг өвчин нь Poxviridae овгийн Orthopoxvirus төрөлд багтдаг сармагчингийн вирусээс үүссэн. Төв болон Баруун Африкийн халуун орны ширэнгэн ойд тархдаг зоонозын өвчин юм. Африк тивээс өөр тив рүү халдах нь ховор байсан ч Европт 100 орчим тохиолдол илэрч ДЭМБ-ыг түгшүүр авахуулав. Сармагчингийн цэцэг нь ихэвчлэн халуурах, тууралт гарах, тунгалгийн зангилаа томрох зэрэг эмнэлзүйн шинж тэмдэг илэрдэг байна. Өвчлөлт 2-4 долоо хоног үргэлжилдэг ба нас баралтын 3-6%-тай байдаг аж. Сармагчны цэцэг өвчин нь өвчтэй хүн, амьтантай ойр харьцах үед дуслаар эсхүл вирусээр бохирдсон эд зүйлсээр дамжин халдварладаг.Гэсэн хэдий ч эрдэмтэд вирус SARS-COV-2 шиг амархан тархдаггүй тул дэгдэлт нь COVID-19 шиг тахал болж хувирна гэж үзэхгүй байна.Сармагчны цэцэг өвчний эсрэг тусгай вакцин байхгүй ч ДЭМБ-ын мэдээлснээр салхин цэцэг өвчний эсрэг хийдэг вакцинууд сармагчингийн цэцэг өвчний эсрэг 85% хүртэл үр дүнтэй байдаг.
