Японы мэргэжлийн сүмогийн зуны тэмцээн буюу Нацү башё өндөрлөх дөхөж байна. Монгол бөхчүүдээс макүшита зиндаанд зүүний наймд эрэмбэлэгдсэн “Нарүто” дэвжээний монгол бөх Оошёоүма Пүрэвсүрэнгийн Дэлгэрбаяр долоо дахь даваагаа авч, өвдөг шороодолгүйгээр түрүү бөхөөр тодров. Оюутны ёкозүнагаас шууд макүшитагаас барилдаж эхэлсэн тэрбээр сүүлийн барилдаанд Китахаримаг өвдөг шороодуулсан юм. Өдгөө 25 настай П.Дэлгэрбаяр дөрөв дэх башёдоо анхны түрүүгээ хүртсэн юм. Оошёоүма долдугаар сарын Нагоя башёд жюүрёо зиндаа руу өгсч, саньякү цолтой барилдах боломжтой болсон бөгөөд Монголын 37 дахь сэкитори болж байна.
