Өнөөдөр манайхны амтай бүхэн Шри Ланк улсын дампуурлыг ярьж зарим нь шоолж, зарим нь болгоомжилж байна. Өнөөдөр Шри Ланк улс түүхэндээ анх удаа зээлийн хүүгийн төлбөрөө төлж чадахгүйд хүрч “default” буюу дампуурлаа зарлахад хүрсэн. Одоо гарах гарц нь ОУВС-аас дахин зээл авч өрөө төлөх. 22.1 сая хүн амтай энэ улсын нийт гадаад өр нь $50 тэрбум доллар. Нэг хүнд ногдох гадаад өр нь ~$2,380. Манай улсын хувьд нийт гадаад өр $33 тэрбум доллар, нэг хүнд ногдох гадаад өр ~$14,000 буюу 43,954,000 төгрөг. Манай нэг хүнд ногдох гадаад өр дампуурлаа зарлаад буй Шри Ланктай харьцуулвал хамаагүй их, бүр 5.8 дахин их байгаа нь ноцтой шүү!
Шри Ланк улс өмнө нь бас зээлээ төлж чадахгүйд хүрээд далайн боомтын газраа Хятад улсад өрөндөө өгч байсан түүхтэй. Өнөөдөр Шри Ланк улсын нийт гадаад өрийн ~14% буюу $6-7 тэрбум доллар нь БНХАУ-аас авсан зээл юм. Шри Ланкны ард иргэд өрийн асуудлаар жагсаал хийж үймээн дэгдээн өр тавьсан дарга нар, засгийн газрын гишүүдээ шийтгэж хог руу толгойгоор нь хийж байна. Гэлээ гээд өр хэвээр байна. Өрийг Шри Ланкын ард түмэн төлөх болно.
Бодит байдал дээр Монгол улс маань Шри Ланка улсаас дор хэмжээнд, маш аюултай байдалд байна. Гэхдээ гадаад өрийн дарамт өнөө маргаашдаа ирэхгүй! Яагаад гэвэл манай үе үеийн засгийн газар, одоогийн засгийн газар хүртэл Өрийг өрөөр дарах бодлого барьж өөрсдөө хариуцлагаас зайлан гадаад өрөө улам бүр нэмсээр өнөөдөр Монгол улс төлж чадахгүй хэмжээнд, $33 тэрбум долларт хүргэсэн. Энэ асар их өрийн дарамт Монголчуудын нуруун дээр 4-8 жилийн дараа бодитоор бууна! Тэр үед бид яах вэ? Өмнийн говио өрөндөө өгөх үү? Бас ахиад зээла аваад бидний үр хүүхдүүд зөвхөн зээл, зээлийн хүүг дарахын төлөө ажиллаж амьдрах уу?
