Дорнод аймагт алга болсон 12 настай хүүхэдтэй холбоотой асуудлаар ЦЕГ, ХНХЯ, ГБХЗГ-аас мэдээлэл хийлээ.
ХНХ-ын сайд Х.Булгантуяа "Улсын хэмжээнд 1.2 сая хүүхэд бий. Жилд 1000 орчим хүүхэд гэмт хэрэг үйлдэж байгаа бол 1500 орчим хүүхэд гэмт хэргийн ослын хохирогч болж үлдэж байна. Он гарсаар 108 төвд 70 мянга орчим дуудлага ирсэн байхад 50 хувь нь зорилтот дуудлага байна.
Хүчирхийллийн гэмт хэрэг үйлдсэн этгээдийг зураг, нэртэй нь олон нийтэд зарлана. Тэгэхгүй бол хэрэг хийсэн этгээд нь хууль шүүхийн байгууллагын ял шийтгүүлээд гарч ирээд дахин хэрэг үйлдэж байна. Хүүхэд алга болсон хэрэгт ч ийм зүйл болсон байж магадгүй гэх хардлага байна.
Ингэж байж бид хүүхдийн эсрэг хүчирхийлэлтэй хатуу тэмцэх арга хэмжээг авна.
Шилжих хөдөлгөөний дунд хүүхэд бүртгэлгүй хохирч үлдэх магадлалтай байдаг. Хэдэн жилийн өмнө хойд эцгийнхээ гарт нас барсан охины асуудалд сургуулийн багш нь уг асуудлыг мэдэж нийгмийн ажилтантай хамтраад ажиллаад эхэлхэд гэр нь өөр тийшээ нүүж, өөр сургуульд бүртгүүлчихсэн байсан.
Тэгэхээр хүүхэд болгон цахим хувийн хэрэгтэй болъё. Тэр хүүхдийн цахим хувийн хэрэг нь гэр бүлийн зөрчлийн мэдээлэл, гэмт хэрэг үүсэхэд тухайн хүүхдийн хувийн хэрэгт мэдээлэл үүсэж байдаг. Багш, эрүүл мэндийн байгууллага үүнд анхаарч байх хэрэгтэй.
Хүүхэд хамгааллын чиглэлээр мэдээлэл сурталчилгаа явуулах хэрэгтэй байна. Үүнд бүх талаас хамтран ажиллах шаардлагатай байна" гэлээ.
Мөн Хүүхэд хамгааллын тухай хуулийн шинэчилсэн найруулгыг өргөн барих гээд бэлдсэн. Хуулийн үр дүнд "Хүн бүр хүүхэд хамгаалагч болоосой" гэсэн уриалгыг дэвшүүлж байгаа. ХНХЯ-ны харьяа ГБХЗГ-ын төсвөөр Монголын нэг хүүхдэд таван мянган төгрөг оногдож байна. 2024 онд 8 тэрбум төгрөгийн төсвийг нь 14 тэрбум төгрөг болгохоор УИХ-д өргөн бариад байна. Ингэж байж бид хүүхэд хамгааллын ажлыг илүү өргөн цар хүрээнд хийх боломж бүрдэнэ гэдгийг хэлж байв.
