Дорноговь аймагт 12 настай хүүхэд алга болсон, эрэн хайх ажиллагаа хэрхэн явагдаж байгаа болон хүүхэд хамгааллын асуудлаар Цагдаагийн ерөнхий газар болон ХНХЯ, Гэр бүл хөгжлийн газраас хамтран мэдээлэл хийлээ.
ЦЕГ-ын мөрдөн байцаах албаны дарга Н.Мишигдорж “Охиныг эрэн хайх ажиллагаа явагдаж байна. Дорноговь, Өмнөговь аймгийн цагдаагийн бие бүрэлдэхүүн Дорноговиос Өмнөговь аймгийн Мандах сум хүртэл эрэн хайх ажиллагааг зохион байгуулж байна. Мөн агаараас эрэн хайх ажиллагаа явагдаж байна.
Сэтгүүлчид маань хүүхэдтэй холбоотой асуудалд маш болгоомжтой хандаж мэдээлэхийг хүсч байна. Хэвлэлээр эх сурвалж нь тодорхойгүй мэдээлэл явснаас болж мөрдөн шалгах ажиллагаанд саад учирдаг. Тиймээс цензуртэй мэдээлэл дамжуулна уу.Мэдээллийн батлагдсан эх сурвалжаас түгээх нь чухал байна.
Эрүүгийн хуулийн 29.5-д зааснаар Прокуророос зөвшөөрөл авч, мэдээлэх боломжтой гэж үзсэн хэмжээндээ л мэдээллийг өгдөг” гэв.
ЦЕГ-ын урьдчилан сэргийлэх хэлтсийн дарга Г.Арсланхуяг “Өнөөдөр Улаанбаатар хотын төв талбайгаас баруун 4 зам хүртэл 300 орчим камер бий. Чингэлтэй дүүрэг камерын ногоон бүсийг бий болгож чадсан. Ингэснээр гэмт хэргийн илрүүлэлт 70 гаруй хувьтай байна.
Гэр бүлийн хүчирхийлэл тэр тусмаа хүүхдийн эсрэг гэмт хэрэг үйлдсэн этгээдийн олон улсын жишгээр олон нийтэд шууд мэдээлдэг байх талаар бид бас ярилцаж байна.
Насанд хүрээгүй хүүхэд алга болсон тохиолдолд шууд эрэн сурвалжлах ажиллагааг эхлүүлдэг. Камержуулах ажиллагааг тухайн орон нутаг төсөвтөө суулгаж хийх үүрэгтэй. 2012-2022 онд 10 мянга гаруй камер байршуулснаас 50 орчим хувь нь ажиллаж байна” гэв.
