Энэ сарын 03-нд Дорноговь аймгийн Сайншандад алга болсон 12 настай охиныг эрэн хайх ажиллагаа үргэлжилж байгаа талаар Дорноговь аймгийн Онцгой комиссоос мэдээлэл өглөө.
Энэ сарын 03-нд Дорноговь аймгийн Сайншандад 12 настай охин алга болсон гэх мэдээлэл ирүүлсний дагуу эрэн хайх ажиллагааг зохион байгуулж байна. Хууль хяналтын байгууллагынхан Сайншанд хотын 32 цэгийн 69 камер, 15 аж ахуйн нэгжийн теле камерыг судалж тухайн гэмт хэрэг үйлдсэн этгээдийн чиглэлийг тогтоож аймгаас баруун зүгт Сайхандулаан сумын чиглэлд явсныг тогтоосон. Эрлийн ажиллагааны үр дүнд сэжигтнийг Өмнөговь аймгийн нутгаас олсон. Тухайн сэжигтэн жолоодож явсан машиныхаа улсын дугаарыг өөрчилж, машины өнгийг мөн өөрчилж будсан байж болзошгүй байгаа.
Өнөөдөр буюу 10 дугаар сарын 5-ны өглөө ОБЕГ-ын агаараас эрэн хайх нисэх нэгж, ЦЕГ-ын Эрүүгийн цагдаагийн алба, Мөрдөн байцаах албаны хамтарсан ажлын хэсэг 7.00 цагт Улаанбаатараас хөөрч, Мандах сумын нутаг дэвсгэрт ирсэн. Одоо агаараас эрэн хайх ажиллагаа үргэлжилж байна. Манлай суманд ажилласан ажлын хэсэг Дорноговь аймгийн Мандах сум чиглэлд эрэн хайх ажиллагааг эхлүүлсэн.
Сайхандулаан сумын ажлын хэсэг мөн эрэн хайх ажиллагаа эхлүүлсэн. Одоогоор алга болсон охиныг олоогүй. Эрлийн ажил үргэлжилж байна" гэв.
