“Эко Констракшн” компанийн барьж ашиглалтад оруулсан Кинг тауэр-ын оршин суугчид нэгдэн удтал шийдвэрлэж чадахгүй байсан хотхоноосоо хойш гарах авто замын орц гарцын асуудлыг хотын захиргаанд хүргэн өөрсдийн талд шийдвэрлүүлснээр олон мянган оршин суугчдын эрх ашиг, аюулгүй байдал хангагдаж чаджээ.
“Хурд” группийн барьсан “ХҮННҮ 2222”-ийн тавьсан зам “ЭКО констракшн”-той хамтарч бариагүй гэх маргаан хоёр байгууллагын хоорондын асуудал учраас оршин суугчид эсэргүүцлээ илэрхийлж хотхоныхоо гадаа жагсаж байсан юм.
Удалгүй оршин суугчид нэгдэн дотроосоо СӨХ-өө байгуулж гарц гаргуулах хүсэлтээ хотын удирдлагуудад удаа дараа тавьсны үр дүнд гарцаа гаргуулсан юм.
“ЭКО констракшн” компанийн байгуулсан Маршал Кинг СӨХ ажлаа хийдэггүйгээс болж байрны үнэ жилээс жилд унаж, оршин суугчдийн мөнгийг хувь хүний дансаар авдаг, авсан мөнгөөрөө хийсэн ажил байхгүй, өмнөх барьсан орон сууцнуудынхаа үнэ цэнийг унагаасан гэх олон тооны зөрчил гаргасан. Түүнчлэн уг СӨХ-ийн дарга Г.Амартүвшин нь иргэдийн СӨХ-ийн төлбөрийг хувьдаа завшсан нь аудитын шалгалтаар тогтоогдсон бөгөөд ажлаа хаяад зугтаажээ.
Одоо оршин суугчдын дахин нэг хөндөж байгаа асуудал нь ХУД-ийн 17 дугаар хороонд улсын сургууль цэцэрлэг байхгүй байгаа асуудал юм. Тиймээс Кинг Тауэрын баруун талд байгаа “ЭКО констракшн”-ын С.Нямдааваагийн эзэмшилд байгаа газрыг чөлөөлүүлж сургууль барих ажлыг хотын удирдлагад хүсэлт гаргаж бүх оршин суугчдийн гарын үсгийг цуглуулан хотын удирдлагуудад хүсэлтээ тавьсан байна.
Харин хотын дарга Д.Сумьяабазар уг ажлыг дэмжиж сургууль барих болно гэсэн амлалт өгчээ. Оршин суугчид дотроосоо СӨХ-өө байгуулснаар үл хөдлөх хөрөнгийнхөө үнэ цэнийг хэвээр хадгалж, өсөх боломжийг бий болгох зорилготой бөгөөд эрүүл аюулгүй орчинд амьдрах боломжийг бүрдүүлж, хяналт тавьж ажиллах юм.
Оршин суугчдаас бүрдсэн шинэ СӨХ-ын хүний нөөцийн хувьд Барилгын инженер, хуульч, Олон Улсын байгууллагуудад ажиллаж байсан туршлагатай хүмүүсээр багаа бүрдүүлжээ. Кинг таур нь байршлын хувьд цэцэрлэгт хүрээлэнтэй залгаа, цэвэр агаарт хотын хамгийн үнэ цэнэтэй байршилд байрладаг, чанарын өндөр төвшинд баригдсан, ногоон байгууламж сайтай, хотхон дотроо улсын цэцэрлэгтэй гээд олон давуу талтай юм.
Оршин суугчдын байгуулсан СӨХ-ын хувьд Улаанбаатар хотын шилдэг СӨХ, шилдэг хөрш, шилдэг нийгмийн хариуцлага хэрэгжүүлэгч оршин суугчид болно гэх зорилт тавин ажиллаж байгаа ажээ.
Эх сурвалж: Gerelnews.mn
