Засгийн газрын өнөөдрийн /2023.10.04/ ээлжит хуралдаанаар Нийслэлийн Засаг дарга Д.Сумъяабазар үүрэгт ажлаасаа чөлөөлөгдөх өргөдлөө өгсөн учраас Улаанбаатар хотод үүсээд байгаа нөхцөл байдал болон дараагийн Засаг даргыг томилох асуудлыг хэлэлцсэн байна.
ЗГХЭГ-ын дарга Д.Амарбаясгалан "Засгийн газраас Улаанбаатар хотын түгжрэлийг бууруулах, нийтийн тээврийн парк шинэчлэлийг хийх чиглэлд улсын төсөвт бодлогоор 320 орчим тэрбум төгрөг тусгаж өгсөн. Гэвч хэрэгжүүлэх шатандаа бодит алдаа дутагдал гаргасан гэж үзсэн. Тиймээс нийслэлийн Засаг дарга өөрөө энэ үйлдэлдээ уучлал хүсч, ажлаас чөлөөлөгдөх өргөдөл өгсөн.
Засгийн газрын хуралдаан дээр энэхүү нөхцөл байдлыг харгалзан, Улаанбаатар хотод онцгой анхаарал хандуулж, 6 сарын хугацаатай Засгийн газрын анхаарал ажиллах нөхцөлийг бүрдүүлэх үүрэг чиглэлийг өгч, ХЗДХ-ийн сайд Х.Нямбаатарыг Нийслэлийн Засаг даргад нэр дэвшүүлэхээр шийдсэн.
Х.Нямбаатар сайдад Улаанбаатар хотод томоохон өөрчлөлт шинэчлэлт цогцоор хийх үүрэг даалгавар өгөхөөр шийдвэрлэж байгаа юм.
Мөн Нийслэл дүүргийн түвшинд бүтэц зохион байгуулалтын томоохон өөрчлөлт хийх шаардлагатай гэж Ерөнхий сайдын зүгээс үзэж байгаа юм.
Сайд Х.Нямбаатар УИХ, Засгийн газрын гишүүнээс татгалзаж, Хотын Засаг даргын ажлыг дангаар гүйцэтгэнэ. Гэхдээ Засгийн газраас шийдвэр гаргаж, бүрэн эрхт төлөөлөгч хэлбэрээр ажиллах нөхцөлийг бий болгохоор болсон" гэлээ.
Мөн Х.Нямбаатар сайдын хувьд Засгийн газрын хэд хэдэн томоохон ажиллагааг хариуцаж байсан учраас түүний албан үүргийг салбар хариуцсан сайд нар нь хариуцахаар үүрэг чиглэл болгосон гэв. МАН-ын удирдах зөвлөл 14 цагаас хуралдаж, нийслэлийн Засаг даргыг томилох, ХЗДХ-ийн сайд томилох зэрэг асуудлыг хэлэлцэж, эцэслэх нь.
