Ардын хувьсгал ялснаас хойшхи Үндэсний баяр наадам тэмдэглэсэн хугацаанд Үндэсний бөхөд нийгмийн гарал үүсэл, эрхэлсэн ажлаар нь ялгаварлаж хандсан тохиолдол байсан. Жишээ нь, лам хүн түрүүлсэн учраас цол олгохгүй эсвэл арслан авах ёстой байтал заан цол олгосон гэх мэт 63 хүний асуудал бий. Гэхдээ Үндэсний баяр наадмын тухай хуулийн шинэчилсэн найруулгаар энийг зохицуулах талаар тодорхой тусгаагүй. Харин дагаж мөрдөх журмын хуулиар зохицуулах бүрэн боломжтой гэж Хууль зүй дотоод хэргийн яамнаас үзжээ. ХЗДХЯ-ны Төрийн нарийн бичгийн дарга П.Сайнзориг “Энэ 63 хүний хувьд ихэнх нь мөнх бусыг үзсэн хүмүүс. Гэхдээ ар гэрийнх нь зүгээс эхнээсээ Захиргааны хэргийн шүүхэд хандсан. Тэгэхээр үүнийг дагаж мөрдөх журмын хуулиар зохицуулаад явна” гэлээ.
