МАН-ын удирдах зөвлөл өнөөдөр хуралдаж, Засгийн газрын нэг сайд, нийслэлийн Засаг даргын томилгооны асуудлыг ярилцахаар товлосон боловч, хурлыг маргааш хүртэл хойшлуулсан байна.
Засгийн газрын сайд Ж.Сүхбаатар, Нийслэлийн Засаг дарга Д.Сумъяабазар нар өчигдөр ажлаа хүлээлгэж өгч буйгаа мэдэгдсэн даруй дараагийн хүмүүсийн нэр яригдаж эхэлсэн юм. Нийслэлийн Засаг даргад ЦХХХ-ын сайд Н.Учрал, НИТХ-ын Тэргүүлэгчдийн дарга Ж.Батбаясгалан, УУХҮ-ийн дэд сайд асан О.Батнайрамдал нарын нэр яригдаж байсан ч эх сурвалжийн мэдээллээр МАН-ын удирдах зөвлөл, Засгийн газрын зүгээс ХЗДХ-ийн сайд Х.Нямбаатарыг энэ албан тушаалд томилохоор шийдвэрлэж байгаа бололтой.
Мэдээж, нийслэлийн төсвийн зарцуулалт, газрын хууль бус олголт, ногоон автобусны худалдан авалт зэрэг олон асуудлыг УИХ, орон нутгийн сонгуулиас өмнө цэгцлэхэд Засгийн газрын түвшинд ойлголцох зангарагтай нэгэн хэрэгтэй байгаа. Тиймээс Ерөнхий сайдын зүгээс ХЗДХ-ийн сайд Х.Нямбаатарыг санал болгосон биз.
Х.Нямбаатар нь 2000 онд Орхон их сургуулийн багшаас ажлын гараагаа эхэлж, өмгөөлөгч, Сонгинохайрхан дүүргийн хуулийн зөвлөх, тус дүүргийн Төрийн захиргаа, удирдлагын хэлтсийн дарга, дүүргийн ИТХ-ийн тэргүүлэгчдийн даргас 2016 онд УИХ-ын гишүүнээр сонгогдон, 2020 оноос ХЗДХ-ийн сайдаар ажиллаж байгаа юм.
