УИХ-дахь АН-ын бүлгийн хуралдаанаас гарсан шийдвэрийг танилцуулах үеэр "Ногоон автобус"-ны асуудлыг хамгийн анх хөндөж, АТГ-т хүргүүлсэн АН-н Үндэсний бодлогын хорооны гишүүн Ж.Энхбатад дарамт шахалт сошиал хаягаар болон мессежээр их ирж байгаа. Тийм учраас Ж.Энхбатыг төрийн хамгаалалтад авахыг хүсэж байгаа талаар АН-ын тэргүүн дэд дарга С.Баярцогт хэлсэн юм.
Харин энэ талаар АН-н Үндэсний бодлогын хорооны гишүүн Ж.Энхбат "Ногоон автобустай холбоотой асуудлаар хуулийн дагуу баримт нотолгоотой, авто тээврийн мэргэшсэн инженерийн хувьд техникийн үзүүлэлтүүдийг ил тод болгооч ээ гэдэг асуудлаар өөрийн цахим хаягт байршуулсан. Явах эд анги, мотор, хөдөлгүүр яагаад нууц орох биш олон нийтэд ил болох ёстой. Тус асуудлаар хуулийн дагуу хуульч нартай сууж мэргэжил арга зүйн зөвөлгөө авч АТГ-т гомдол өгсөн. Үүний дагуу гэрчийн мэдүүлэг өгч, холбогдох материалуудаа дуудсан цагт нь очиж өгч байна. Тус асуудлаар Монгол улсын иргэн Ж.Энхбатын хувьд Засгийн газрын ямар тогтоол шийдвэрээр улсын нууцад оруулсан талаарх тогтоолоо олон нийтэд ил болгох шаардлагыг Ерөнхий сайдад өгсөн.
Шүгэл үлээсний үр дүнд ар гэр, хамаатан садан руу таних, танихгүй дугаараас маш их холбогдож байна. Миний цахим хаягаар "Нялх нойтон хүүхэдтэй байж аяа бодоорой. Хаана амьдардгийг чинь мэднэ шүү" гэх зэргээр маш их дарамт ирж байна. Засгийн газрын 5Ш ажиллагааг баталсан. Шүгэл үлээгчийн эрх ашгийг хамгаалаач ээ" гэв.
