УИХ-ын намрын чуулган өнөөдрөөс эхэлж, УИХ дахь намын бүлгүүд хуралдлаа.
МАН-ын бүлгийн хуралд Ерөнхий сайд оролцож, нийгмийн бухимдлыг өдөөгөөд байгаа нийслэлийн нийтийн тээврийн парк шинэчлэл тойрсон асуудлыг хэлэлцжээ. Ерөнхий сайд Л.Оюун-Эрдэнэ Засгийн газар өнгөрсөн 30 жилд байгаагүйгээр дэмжсэн атал нийслэлийн удирдлагуудын үйл ажиллагаа үнэхээр хангалтгүй байгааг хэлсэн байна.
Тэрээр "Засгийн газрын зүгээс Түгжрэлийн эсрэг үндэсний хороо байгуулж, нийслэлийн эрхзүйн байдлын тухай хуулийг батлуулж, нийслэлийн төсвийн бие даасан байдлыг бүрдүүлсэн, төсвөөс 420 тэрбум төгрөгийг нийслэлд хуваарилсан гээд онцгойлон нийслэлийг дэмжсэн байтал төсвийн зарцуулалт дээр алдаа дутагдал гарсаар байна. Сэлбэ сэргэлт, холбоос зам, LRT , дагуул хот гэх мэт томоохон төсөл бүтээн байгуулалтын асуудалд бүх түвшинд дэмжлэг үзүүлсэн. Өнгөрсөн 30 жил үзүүлээгүй дэмжлэг өгсөн.
АТГ одоо төсвийн зарцуулалтын гүйлгээг шалгаж байна. Авлигын асуудал гарвал өөрсдөдөө гомдоорой.
Удирдлагуудын хайнга, арчаагүй үйлдлээс болж нийслэлчүүд бүхэлдээ хохирч болохгүй. Нийтийн тээврийн салбар ч замбараагүй газар олголтын нэг адил авлигын сүлжээтэй гэдэг нь харагдаж байна. Өнөөдрийг хүртэл багагүй хөрөнгө зарцуулсан ч огт сайжраагүй нь үүнтэй холбоотой болохоор 2009 оноос хойш шинэчлэл хийгдээгүй байгаа юм. Нийслэлд онцгой анхаарал хандуулна. Хатигийг уутаар шахах ёстой. Өвдөлт өгөх нь мэдээж" гэсэн байна.
УИХ дахь МАН-ын бүлгийн дарга Д.Тогтохсүрэн энэ тухайд "бүлгийн хурлаад нийслэлийн нийтийн тээврийн шинэчлэлийн худалдан авах ажиллагаатай холбоотой гарсан асуудалд Ж.Сүхбаатар сайдын мэдээллийг сонссон" гээд "Ж.Сүхбаатар сайд өөрөө өргөдлөө өгсөн. Нэгэнт түгжрэлийг бууруулах чиглэлээр идэвхтэй ажиллаж байсан ч алдаа гаргасан болохоор өргөдлөө өгөх нь зүйтэй гэж үзсэн. Нийслэлд ужгирсан хоёр, гурван том асуудал бий. Газар олголт, түгжрэл зэрэг. УИХ, Засгийн газрын хамтарсан Ажлын хэсгийг гаргахаар боллоо. Ерөнхий сайд нийслэлд болохгүй байгаа асуудал дээр шуурхай ажиллах шаардлага байна гэж үзсэн. Ялангуяа авлигатай тэмцэх асуудлаар. Ногоон автобустай холбоотой асуудлаар хэрэг бүртгэх, мөрдөн байцаах ажиллагаа явуулж байгаа юм билээ. Гурав дахь өдөр Засгийн газрын хуралдаанаар танилцуулна. Тэрний дараа Ерөнхий сайд хариуцлага тооцохоор болсон" гэлээ.
