Багш нар цалингаа нэмүүлэх шаардлагыг тавьж байгаа. Өнөөдөр Монголын багш нарын үйлдвэрчний эвлэлийн холбооноос багш нарын цалинг 1000 ам.долларт хүргэхийг шаардаж БШУЯ-ны гадна жагсаж байна.
Тэгвэл БШУ-ны сайд Л.Энх-Амгалан уг асуудалд байр сууриа илэрхийллээ. Тэрбээр "Монгол улсын Засгийн газар гурван талын хэлэлцээрийг Монголын үйлдвэрчний эвлэлтэй албан ёсны хэлэлцээр хийдэг. Ийм хуулийн зохицуулалттай. Аль нэг хууль бус байгууллага гарч ирээд хууль бус шаардлага тавьж болохгүй. Зорилго нь зөв ч арга нь буруу байна. Өөрсдөө хууль бус шийдвэр гаргаад хууль бус ажил хаялт зарлавал буцаад бид хууль хяналтын байгууллагад хандахаас өөр аргагүй.
Болдогсон бол бүх төрийн албан хаагчдын цалинг 1000 доллар болгох хүсэл байна. Боловсролын салбарт цалин нэмэгдсэн. 2024 оны төсвийн байдлаар нийт төсвийн байгууллагын албан хаагчдын тэтгэвэр цалинг 10 хувиар нэмэх, хөдөө орон нутагт ажиллаж байгаа төрийн албан хаагчдыг сум төвд 40 хувь, аймагт 20 хувь нэмэх шийдвэр гарч байна. Цалин хөлсний бодлого Засгийн газрын нэг цонхны бодлогоор явна.
Гүйцэтгэлийн үнэлгээгээс бид нэг ч алхам буцахгүй. Хамгийн сайн багш хамгийн өндөр цалин авна. Нэгдүгээр сарын 1-нээс эхлэн гүйцэтгэлийн үнэлгээгээр хамгийн өндөр оноо авсан багш нар цалингийнхаа 50 хувь хүртэлх хувийн урамшууллыг авна. Хавтгайгаар нь үр дүн тооцдог байсан үр дүнгийн урамшууллыг бид халсан. Үр дүнгээр муу үнэлэгдчихээд бид нарын ажил үнэлэгдэхгүй байна гэх буруу жишиг тогтож болохгүй” гэв.
